საქართველო ევროკავშირის ერთიან როუმინგულ სივრცესთან მიერთებაზე მუშაობს. ცხადია, სამთავრობო და საკანონმდებლო დონეზე მუშაობა მიმდინარეობს, მაგრამ „კომერსანტი“ დაინტერესდა რას ფიქრობს აღნიშნულ საკითხზე თავად ბიზნესი.
როგორც კომუნიკაციების ბაზარზე “ბილაინის“ ბრენდით ოპერირებად კომპანია შპს „ვიონი საქართველოში“ „კომერსანტს“ უთხრეს „ბილაინი“ ამ პროექტში ჩასართავად უკვე მზადაა.
„როუმინგის ტარიფის გაუქმება და ევროკავშირთან საერთო სივრცის შექმნა, რა თქმა უნდა, მისასალმებელი ინიციატივაა, რადგანაც ევროპასთან კიდევ მეტად გვაახლოვებს. ტექნიკურად „ბილაინი“ მზადაა, რაც შეეხება ტარიფებს - ორმხრივი პროცესია, რაც იმას ნიშნავს, რომ ევროკავშირის მობილური ოპერატორების მხრიდანაც იქნება გადასახედი ფასები, რომლებსაც ახლა გვაწვდიან“, - განაცხადა კომპანიის საზოგადოებასთან ურთიერთობების ხელმძღვანელმა სოფო ბალავაძემ.
შეგახსენებთ, რომ საქართველო-ევროკავშირის ერთიან როუმინგულ სივრცესთან მიერთების საკითხზე საკანონმდებლო ორგანოში სატელეკომუნიკაციო მომსახურების სფეროს წარმომადგენლებთან რამდენიმე სამუშაო შეხვედრა უკვე გაიმართა.
საგულისხმოა, რომ საქართველოს, EU-სა და აღმოსავლეთ პარტნიორობის სხვა ქვეყნებს შორის როუმინგული ტარიფების შემცირებაზე მუშაობა უკვე რამდენიმე წელია მიმდინარეობს.
პლატფორმა EU4Digital-მა როუმინგის ტარიფების ჰარმონიზების შესახებ პირველი კვლევა ჯერ კიდევ 2017 წელს მოამზადა, ხოლო 2019 წლის ნოემბერში გამოაქვეყნა დოკუმენტი, რომელიც ამ მიმართულებით სტანდარტებისა და ინფრასტრუქტურის ცვლილებებს განიხილავდა.