აშშ-ის ხაზინის დეპარტამენტი უცხოურ ფინანსურ ინსტიტუტებს დასჯით დაემუქრება რუსეთის გადახდის ბარათების ეროვნულ სისტემასთან თანამშრომლობისთვის, რომელიც რუსული გადახდის სისტემა „Мир“-ის ოპერატორია. ამის შესახებ ხაზინის ვებგვერდზე გავრცელებულ განცხადებაში არის ნათქვამი.
თუმცა გადახდის ბარათების ეროვნული სისტემა ხაზინის ახალი სანქციების ქვეშ არ მოექცა. თეთრმა სახლმა SDN-ის (Specially Designated Nationals) სასანქციე სია განაახლა, რომელშიც კიდევ 22 ფიზიკური და 2 იურიდიული პირი მოხვდა.
„ის არაამერიკული ფინანსური ინსტიტუტები, რომლებიც რუსეთის გადახდის ბარათების ეროვნულ სისტემასთან ახალ ან გაფართოებულ შეთანხმებებს დებენ, აშშ-ის სანქციების გვერდის ასავლელად რუსეთის მხარდაჭერით რისკავენ. ასეთი რისკები რუსეთის ტერიტორიის გარეთ სისტემა „Мир“-ის გაფართოებული გამოყენების გამო წარმოიქმნება“, - ნათქვამია აშშ-ის ხაზინის განცხადებაში.
უწყება ხაზგასმით აღნიშნავს, რომ გადახდის ბარათების ეროვნული სისტემა რუსეთის ზოგიერთი ბანკისთვის ტრანზაქციებს ამუშავებს, რაც შესაძლოა, გამოყენებულ იქნეს „სხვა მხარეების გადახდების დასამუშავებლად“.
ამასთან, აშშ-ის ხაზინის სასანქციე დეპარტამენტმა (OFAC) მოიპოვა უფლება, დააწესოს დაბლოკვის სანქციები იმ პირების მიმართ, რომლებიც აფინანსებდნენ ან ფინანსურ და ტექნოლოგიურ მხარდაჭერას ეწეოდნენ, აწვდიდნენ საქონელს ან უწევდნენ მომსახურებას „სანქციებს დაქვემდებარებული საქმიანობის მხარდასაჭერად.“ ეს ზომა, ასევე, რუსეთის ფარგლებს გარეთ „Мир“-ის სისტემის გაფართოების მცდელობებს შეეხება.
გარდა ამისა, შეერთებულმა შტატებმა სანქციების სიაში შეიყვანა ფედერაციის გადახდის ბარათების ეროვნული სისტემის გენერალური დირექტორი, ვლადიმერ კომლევი; ჩეჩნეთის მმართველი, რამზან კადიროვი და მისი ოჯახი; პუტინის თანაშემწე, მაქსიმ ორეშკინი; მოსკოვის ბირჟის ჯგუფში შემავალი ეროვნული საანგარიშსწორებო დეპოზიტარის (NSD) გამგეობის თავმჯდომარე, ვიქტორ ჟიდკოვი; დეპოზიტების დაზღვევის სააგენტოს გენერალური დირექტორი, ანდრეი მელნიკოვი და NSD-ის ყოფილი თავმჯდომარე, ედი ასტანინი.
სანქციების ქვეშ მოხვედრილ ორგანიზაციებს შორის არის კომპიუტერული ტექნიკის მსხვილი რუსული დეველოპერი, მწარმოებელი და მიმწოდებელი, „აკვარიუსი“; მიკროსქემებისა და ჩიპების მწარმოებელი Angstrem; გამოთვლითი სისტემების, ინფორმაციის დამუშავებისა და შენახვის პლატფორმების მწარმოებელი, Kernel Fab Dubna და მიკროელექტრონიკისა და ჩიპების მწარმოებელი, Baikal Electronics.