"რუსეთის დემოგრაფიული კოშმარი სულ უფრო მწვავდება" – ასე აღწერს ბრიტანული გამოცემა The Economist რუსეთში არსებულ დემოგრაფიულ კრიზისს. გამოცემის ცნობით ბოლო სამი წლის განმავლობაში ქვეყნიდან 2 მილიონით მეტი ადამიანი გავიდა, ვიდრე ეს ომის შედეგებით, დაავადებებით და საზღვრებს გარეთ გადინებით არის გამოწვეული.
რუსი მამაკაცების სიცოცხლის ხანგრძლივობა 5 წლით არის შემცირებული, რაც შეეხება 2022 წლის აპრილში დაბადებულებს, მათი რაოდენობა იმაზე მეტი არ ყოფილა ვიდრე ეს ჰიტლერის ოკუპაციის პერიოდში იყო, გარდა ამისა აღსანიშნავია, ისიც, რომ საბრძოლო ასაკის მქონე მამაკაცების დიდი ნაწილი ან გარდაცვლილია ან ემიგრაციაშია, ხოლო ქალების რაოდენობა მამაკაცებისას 10 მილიონით აღემატება.
დასავლური გამოთვლებით, გასულ წელს ომში 175,000-დან 200,000-მდე რუსი დაიღუპა ან დაიჭრა. მობილიზაციას კი 500,000-დან 1 მილიონამდე ახალგაზრდა სხვა ქვეყნებში გაექცა.
რუსეთის სტატისტიკის სახელმწიფო სააგენტოს მონაცემებით, 2020-21 წლებში მოსახლეობა 1.3 მილიონით შემცირდა და გარდაცვალებების მაჩვენებელმა 1.7 მილიონით გადააჭარბა შობადობის მაჩვენებელს. დაღმასვლის ტენდენცია ყველაზე მეტად ეთნიკური რუსების რიცხოვნობაში შეინიშნება, რომელთა რაოდენობაც 2010-21 წლებში 5.4 მილიონით შემცირდა, ხოლო მთლიან მოსახლეობაში მათი წილი 78%-დან 72%-მდე ჩამოვიდა.
ეს ყველაფერი კი ომამდე დაიწყო და კოვიდ-პანდემიის მოცემულობას ასახავს. ოფიციალური მონაცემებით, ინფექციამ 388,091 ადამიანი იმსხვერპლა, მაგრამ The Economist-ის გამოთვლებით, 2020-23 წლებში მაჩვენებელი 1.2-1.6 მილიონის ფარგლებში იყო, რაც შეიძლება შევადაროთ ჩინეთისა და აშშ-ს მონაცემებს, რომელთა მოსახლეობის რაოდენობაც ბევრად მეტია.