ბარსელონის ბიომედიცინის ინსტიტუტის მეცნიერებმა ჩაატარეს კვლევა, რომლის თანახმადაც, ცხიმოვანი მჟავა, რომელსაც შეიცავს პალმის ზეთი, სიმსივნის განვითარებას უწყობს ხელს.
„პალმის ზეთში არის რაღაც განსაკუთრებული, რაც მას მეტასტაზების განვითარების ძალიან ძლიერ სტიმულატორად აქცევს“, - განაცხადა მკვლევართა ჯგუფის ხელმძღვანელმა, პროფესორმა სალვადორ აზნარ-ბენიტამ.
თუმცა, მისი თქმით, ეს მხოლოდ წინასწარი მონაცემებია, რომლებსაც დაზუსტება სჭირდებათ, ამიტომაც ამ ეტაპზე ძნელია საუბარი კონკრეტულ დიეტაზე, რომელიც მეტასტაზების გავრცელების პროცესს შეანელებს.
კვლევა აჩვენებს, რომ ზოგადად, პალმის ზეთის შემცველი პროდუქტების რაციონიდან ამოღება შესაძლოა მკურნალობის ერთ-ერთი მეთოდი გახდეს, რადგანაც ზეთში შემავალი ნუტრიონები სიმსივნის უჯრედებზე არაპროპორციულად ძლიერად მოქმედებენ, განსაკუთრებით, მეტასტაზების გავრცელების სტადიაზე.
მეცნიერებმა დაადგინეს, რომ ამ უჯრედების მხოლოდ ნაწილს გააჩნია გავრცელების პოტენციალი და სწორედ მათ აქტიურობაზეა დამოკიდებული დაავადების სიძლიერე. სავარაუდოდ, სწორედ ეს სპეციალიზებული უჯრედებია ძალიან დამოკიდებული ცხიმოვან მჟავაზე, რომელიც არის ნაღების და ზეითუნის ზეთებშიც, თუმცა, განსაკუთრებით ბევრია სწორედ პალმის ზეთში.
მკლევარებმა ექსპერიმენტი ჩაატარეს - პალმის ზეთში შემავალი მჟავა თაგვების რაციონს დაუმატეს და შედეგად პირის ღრუს და კანის კიბოს ალბათობა ბევრად გაიზარდა.
კვლევა იძლევა ვარაუდის საშუალებას, რომ პალმის ზეთის ზემოქმედება სიმსივნურ უჯრედებში გენების ფუნქციაში ცვლილებებს იწვევს, რაც მათ ცხიმოვანი მჟავის უფრო აქტიური მოხმარების საშუალებას აძლევს.
სადღეისოდ ონკოდაავადებულთა სიკვდილიანობის ძირითადი მიზეზი სწორედ მეტასტაზებია, და ამ სტადიაზე დაავადება უკურნებელია - შესაძლებელია მისი მხოლოდ შეჩერება, ზოგჯერ დიდი ხნითაც, მაგრამ არა საბოლო განკურნება.
მეცნიერებმა დაადგინეს, რომელი უჯრედები აქტიურდება ცხიმოვანი მჟავების ზემოქმედების ქვეშ და ამ პროცესის ბლოკირების გზებიც აღმოაჩინეს. შემდგომ ეტაპზე იგეგმება ცილების კვლევა, რომლებიც პალმის ზეთზე უჯრედების რეაგირებას აფერხებენ.
„ამ საფუძველზე შესაძლოა შეიქმნას პრეპარატი, რომელიც პალმის ზეთში ადამიანის ორგანიზმისთვის საფრთხის გამომწვევ მჟავას გაანეიტრალებს და ეს გაცილებით უკეთესი გამოსავალია, ვიდრე დიეტა“, - განაცხადა აზნარ-ბენიტამ.
პროფესორის აზრით, ადამიანის ჯანმრთელობა არ უნდა იყოს დამოკიდებული იმაზე, უყვარს თუ არა მას „Nutella” ან პიცა.
კემბრიჯის უნივერსიტეტის ონკოლოგიურ კვლევათა ინსტიტუტის დირექტორის გრეგ ჰენონის თქმით, ეს ძალიან მნიშვნელოვანი კვლევაა, იმის გათვალისწინებით, რომ პალმის ზეთი - არ არის რაღაცა შორეული, და უცხო პროდუქტი - ადამიანებს მასთან შეხება თითქმის ყოველდღე აქვთ.
„პალმის ზეთს დიდი რაოდენობით შეიცავს გადამუშავებული პროდუქტები, შესაბამისად, ეს კვლევა იძლევა ძლიერ მოტივაციას იმისთვის, რომ გაგრძელდეს სიმსივნის პროგრესირებაზე კვების რაციონის გავლენის შესწავლა“, - მიიჩევს ჰენონი.
theguardian.com