რუსეთის დაზვერვას გააჩნია გავლენა რუსულ ჰაკერულ ჯგუფებზე, რომლებიც ონლაინ-გამოძალვით არიან დაკავებულები და კრემლი მათ შესახებ სრულ ინფორმაციას ფლობს.
თუმცა, ამავე დროს, რუსეთის ხელისუფლება მათ საქმიანობას უშუალოდ არ აკონტროლებს - ნათქვამია საერთაშორისო ორგანიზაციის Recorded Future-ს მიერ ამ თემაზე მომზადებულ ანგარიშში.
კრემლი უფრო თვალს ხუჭავს მათ საქმიანობაზე, ვიდრე ხელმძღვანელობს მათ და ამაზე მეტყველებდა ამ ჯგუფების აქტიურობის შემცირება პუტინის და ბაიდენის შეხვედრის შემდეგ. თუმცა, ბოლო პერიოდში, ქსელში ისევ გამოჩნდა რუსული ჰაკერული ჯგუფი REvil, რომელიც რამდენიმე თვის წინ უეცრად გაქრა.
„ის, რომ აქტივობა შენელდა, იმის მიმანიშნებელია, რომ კრიმინალური დაჯგუფებები კრემლისგან სიგნალს ელოდებიან - თუ როდის შეძლებენ ისინი შეტევების განახლებას. დიდი მნიშვნელობა აქვს ვლადიმირ პუტინის პოზიციას - თუ ის მკაცრად დააყენეს ჰაკერულ ჯგუფებს ახალი რეალობის წინაშე და მათ საქმიანობას ომს გამოუცხადებს, თავდასხმები ძალიან მალე შეწყდება“, - მიიჩნევს აშშ-ის კიბერსამმართველოს დირექტორი კრის ინგლისი.
Recorded Future-ს ანგარიში ადასტურებს ამერიკის ოფიციალურ წრეებში გავრცელებულ აზრს - კრემლი უშუალოდ არ ეუბნება ჰაკერებს რა აკეთონ და როდის, თუმცა მათი საქმიანობის თაობაზე ინფორმირებულია და მას ყველანაირად უწყობს ხელს. შესაბამისი ნების არსებობის შემთხვევაში, პუტინს მათი საქმიანობის სწრაფად შეწყვეტა შეუძლია.
მოსკოვი კიბერდამნაშავეებს საკუთარი გეგმებით მუშაობის უფლებას აძლევს მანამ, სანამ ისინი კრემლს არ უპირისპირდებიან და მათი საქმიანობა მთლიანობაში პუტინის პოლიტიკის მიმართულებებს ემთხვევა. შედეგად, კრემლის კონტროლი ჰაკერულ ჯგუფებზე სუსტია, რაც მას კიბერ-დანაშაულთან კავშირების უარყოფის საშუალებას აძლევს.
თუმცა, შესაძლოა მათ მეტისმეტი მოუვიდეთ და რომელიმე ოპერაციამ აშშ-ის მკვეთრი რეაქცია გამოიწვიოს. პუტინის მიზანი კი ამერიკისთვის თავის ტკივილის გაჩენაა და არა საერთაშორისო სკანდალის გაჩაღება.
რუსეთის მთავრობის მამები ჰაკერებს არ აძლევენ ინსტრუქციებს, ვისი საიტები გატეხონ და ვისი არა, თუმცა, მათ შორის გარკვეული ერთობა არსებობს. ცნობილია რომ რუსეთი წლების მანძილზე არ რეაგირებს კიბერშეტევებზე მანამ, სანამ ჰაკერები რუსეთის წინააღმდეგ არაფერს არ მოიმოქმედებენ.
„რუსეთის მთავრობა ჰაკერებს გარკვეული დაცვას სთავაზობს, ამის სანაცვლოდ კი მათ გამოცდილებას იყენებს. აქ პირველ რიგში პოლიტიკური ინტერესია, მაგრამ არა მხოლოდ - გამოძალვებით მიღებული თანხების ნაწილი რუსი მაღალჩინოსნების ჯიბეებში მიდის“, - მიიჩნევს აშშ-ის გენერალური პროკურორის მოადგილე, რიჩარდ დაუნინგი.
რუსეთის დაზვერვამ ნიჭიერი პროგრამისტების აყვანა ჯერ კიდევ 30 წლის წინ დაიწყო - მათ შორის ისეთებიც იყვნენ, ვინც კიბერდანაშაულის გამო სასჯელს იხდიდნენ. სავარაუდოდ, ეს პრაქტიკა დღესაც გრძელდება. ანგარიშის თანახმად, ბევრი ჰაკერი ნებაყოფლობით ცდილობს რუსეთის სტრატეგიული ინტერესების დაცვას.
მაგალითად, ჰაკერებს შორის ერთ-ერთი ყველაზე ცნობილია უშიშროების ფედერალური სამსახურის ყოფილი მაიორი დმიტრი დოკუჩაევი - მისი სპეციალიზაცია პლასტიკური ბარათების გატეხვა იყო, რის გამოც ის 2017 წელს დააპატიმრეს, თუმცა, 2021 წლის მაისში ის ვადაზე ადრე გაათავისუფლეს. სავარაუდოდ, მან ძალიან კარგად იცის, ზღვარი სად გადის და ვისი აწიოკება დასაშვებია, ვისი კი - არა.
nytimes.com