რუსეთის „ეროვნულმა მონაპოვარმა“ „გაზპრომმა“ გაზსადენის „ჩრდილოეთის ნაკადი-2“ მშენებლობის დასრულების თაობაზე განაცხადა.

ეს პროექტი 8 მლრდ ფუნტი დაჯდა, მრავალი დებატები გამოწვია და კრიტიკოსების აზრით, ის რუსულ გაზზე ევროპის დამოკიდებულებას მნიშვნელოვნად გაზრდის. თუმცა, მილსადენის კომერციული გამოყენება შეუძლებელი იქნება, სანამ გერმანული და ევროპული მარეგულირებელი ორგანოები ამის უფლებას არ მისცემენ.

პროცედურები კი შესაძლოა გაზაფხულამდე გაიწელოს.

ეს ხდება ევროპაში გაზის უპრეცედენტო გაძვირების ფონზე - ეკონომიკის პოსტპანდემიურმა ზრდამ საწვავზე დიდი მოთხოვნა და ამასთან ერთად მწვავე დეფიციტი წარმოქმნა. რუსეთმა, რომელსაც ახალი გაზსადენის ამუშავება თავისი პირობებით სურს, გაზის მიწოდება ევროპაში შეამცირა, პარალელურად გათხევადებული გაზის დიდი ნაკადები აზიაში, განსაკუთრებით ჩინეთში მიემართება.

ამას ემატება ევროპაში გაზსაცავებში საწვავის არასაკმარისი რაოდენობა - ამ სამი ფაქტორის ერთობლიობამ გამოიწვის ის, რომ გაზის ღირებულება 800-900 დოლარამდე გაიზარდა.

ამ ფონზე რუსული მხარე აცხადებს, რომ მზადაა ევროპაში გაზის მიწოდება გაზარდოს, ოღონდ მხოლოდ იმ შემთხვევაში, თუ „ჩრდილოეთის ნაკადი-2“ სასწრაფოდ ამუშავდება.

„მოთხოვნა გაზზე ევროპაში დიდია, თანაც ჯერ გაურკვეველია, როგორი იქნება ზამთარი. თუ სიცივე იქნება, რა თქმა უნდა, მოთხოვნა გაზზე გაიზრდება. „ჩრდილოეთის ნაკადი-2“-ის ამოქმედება ევროპაში საფასო პარამეტრებს მნიშვნელოვნად შეცვლის“, - განაცხადა რუსეთის პრეზიდენტის პრეს-მდივანმა დმიტრი პესკოვმა.

გაზზე რეკორდულად მაღალი ფასები კრემლს ევროპელ პარტნიორებზე ზეწოლის საშუალებას აძლევს იმისთვის, რომ მათ მილსადენის ამუშავების ნებართვა რაც შეიძლება სწრაფად გასცენ.

„რუსული მხარე არსებული მაღალი ფასებიდან მოგების მიღებას და გაზის დამატებითი რაოდენობის ექსპორტს არ აპირებს. კრემლში აცნობიერებენ, რომ ახალ გაზსადენთან დაკავშირებით ჯერ კიდევ ბევრი პრობლემაა და მოთხოვნის ზრდის ფონზე ჩათვალა, რომ ევროპისთვის საკუთარი წესების კარნახი შეუძლია“, - თვლის აღმოსავლეთ ევროპული კვლევების ცენტრის ექსპერტი მარია შაგინა.

თუმცა, პუტინის პრეს-მდივანმა დმიტრი პესკოვმა განაცხადა, რომ ევროპაში გაზის გაძვირებას რუსეთთან არავითარი კავშირი არა აქვს. ევროპის ქვეყნების წინაშე სერიოზული დილემა დგას - ზამთარი ახლოვდება, გაზის მოხმარება ყოველკვირეულად იზრდება, ხოლო შექმნილი დეფიციტის დაფარვის არანაირი სხვა წყარო, რუსული გაზის გარდა, ამ ეტაპზე არ არსებობს.

ევროპულ მარეგულირებელ ორგანოებს მარტივი არჩევანი აქვთ - ან სასწრაფოდ დათანხმდნენ „გაზპრომის“ პირობებს და „ჩრდილოეთის ნაკადი-2“-ს მუშაობის უფლება მისცენ, ან საკუთარ პრინციპებზეა უარი არ თქვან და მძიმე ზამთრისთვის მზადება დაიწყონ.

telegraph.co.uk