26 სექტემბერ ათობით მილიონი გერმანელი საარჩევნო უბნებზე მივიდა, სადაც ანგელა მერკელის 16-წლიანი ეპოქა დასრულდა. ევროპის უმსხვილესი ეკონომიკის ახალ კანცლერს სერიოზული პრობლემა - კერძოდ, ენერგორესურსებზე ფასების კატასტროფული ზრდა - ელის.

გვალვა ბრაზილიაში, გაზის მოპოვების შემცირება ჩრდილოეთის ზღვაში, სწრაფი პოსტპანდემიური აღდგენა და კარანტინის დროს წარმოქმნილი გაზის დეფიციტი - ესაა იმ ფაქტორების მხოლოდ ნაწილი, რომლებმაც ბუნებრივ აირზე ფასების კატასტროფული ზრდა გამოიწვიეს.

ამ ეტაპზე ვითარების გაუმჯობესების არანაირი წინაპირობა არ არსებობს - პირიქით, ყველაფერი იმაზე მიუთითებს, რომ უახლოეს თვეებში ფასების შემცირება არ მოხდება.

2021 წლის დასაწყისიდან ევროპაში გაზი 250%-ით გაძვირდა, რამაც შოკი გამოიწვია - რამდენიმე ქვეყანაში, მათ შორის ბრიტანეთში, მსხვილი ქიმიური საწარმოები გაჩერდა, საფრანგეთში, საბერძნეთში და ესპანეთში მთავრობები ენერგოტარიფების სუბსიდირების შესაძლებლობას განიხილავენ.

გერმანია კი ფასების შეკავების ზომების მიღებას გეგმავს, თუმცა, ეს პრობლემის არა გადაწყვეტა, არამედ გადავადება იქნება. ამ დროისთვის გერმანიაში 310 000 ოჯახს კომუნალური გადასახადები 11%-ით უკვე გაეზარდა, და ეს მხოლოდ დასაწყისია.

ევროკომისიის დეპუტატების სპეციალური გამოძიების ჩატარებას ითხოვენ - ისინი მოსკოვს ადანაშაულებენ იმაში, რომ ის ევროპაში გაზის მიწოდებას სპეციალურად ამცირებს იმისთვის, რომ ევროკავშირის და გერმანიის რეგულატორებმა საკუთარ მოთხოვნებზე უარი თქვან და გაზსადენ „ჩრდილოეთის ნაკადს“ მუშაობის უფლება დაუყოვნებლივ მისცენ.

სპეციალისტების აზრით, ახალი მილსადენი ევროპაში გაზის ფასის შედარებით შემცირებას მართლაც შეძლებს, თუმცა, რუსულ ენერგომატარებლებზე ზედმეტი დამოკიდებულება ევროპაში და შტატებში სერიოზულ შიშებს იწვევს.

თუმცა, ამ ფაქტორის მიუხედავად, გერმანიაში ამ პროექტის წინააღმდეგ თითქმის არავინ გამოდიოდა, ხოლო ამ საკითხში პუტინის მთავარი მოკავშირე სწორედ ანგელა მერკელი იყო. ბოლოს და ბოლოს ამერიკაც, რომელიც დიდხანს ებრძოდა პროექტს, დანებდა - ჯო ბაიდენბა და ანგელა მერკელმა აპრილში მიიღეს ერთობლივი დეკლარაცია, რომელმაც ფაქტობრივად მწვანე შუქი აუნთო „ჩრდილოეთის ნაკადი-2“-ს პროექტის დასრულებას.

გერმანიის პრემიერ-მინისტრობის მთავარი კანდიდატის, ქრისტიან-დემოკრატი არმინ ლაშეტის თქმით, თუ რუსეთი ამ გაზსადენს პოლიტიკურ იარაღად უკრაინის წინააღმდეგ გამოიყენებს, ბერლინი მზადაა  მისი ფუნქციონირება შეაჩეროს.

„ანგელა მერკელს ამ პროექტის დაბლოკვის მრავალი საშუალება ჰქონდა, თუმცა, მან ამის გაკეთება არ მოისურვა. ევროპაში, განსაკუთრებით კი გერმანიაში დღემდე დომინირებს აზრი, რომ რუსეთთან ეკონომიკური თანამშრომლობა მასთან პოლიტიკური კონფრონტაციის რისკს ამცირებს. ეს თავისებური დაზღვევაა, ხოლო გერმანული მრეწველობა დარწმუნებულია, რომ რუსეთი იაფი გაზოს წყაროა“, - განაცხადა ლონდონის სამეფო ინსტიტუტის ექსპერტმა რუსეთის საკითხებში ჯონ ლოუმ.

მისი თქმით, ეს პროექტი უკრაინას დიდ ზიანს აყენებს და გერმანიის მხრიდან პირფერობაა საუბარი კიევის ენერგეტიკული უსაფრთხოების მხარდაჭერაზე და ამავე დროს „ჩრდილოეთის ნაკადი-2“-თან თანამშრომლობა.

„არაა გასაკვირი, რომ მოსკოვი ევროპაში გაზის გაძვირების ფაქტს იყენებს იმისთვის, რომ გერმანიაზე ზეწოლა მოახდინოს. რუსეთი თავიდანვე ამას გეგმავდა და არსებულ შესაძლებლობის გამოყენებას გერმანულ რეგულატორზე ზეწოლისთვის იყენებს“, - მიიჩნევს ჯონ ლოუ.

telegraph.co.uk