მას შემდეგ, რაც მოსკოვის მერმა გამოაცხადა, რომ ვაქცინაცია სავალდებულო იქნება მომსახურეობის სფეროს თანამშრომლებისთვის, სულ რამდენიმე საათი გავიდა და მოსკოვში გაყიდვაში ვაქცინაციის დამადასტურებელი ყალბი სერტიფიკატები გამოჩნდა.

თითქმის ერთ დღე–ღამეში მოსკოვში უზარმაზარი შავი ბაზარი გაჩნდა, რომელსაც საკმაოდ დიდი კლიენტურა გააჩნია – რუსების დიდ ნაწილს კოვიდისგან აცრა არ სურს, დაინფიცირების მასშტაბების ზრდის მიუხედავად.

ამ დროისთვის ყალბი ცნობა საშუალოდ 65 დოლარი ღირს, და უკანონო ოპერაციისთვის კლიენტს თაღლითური ჯგუფის წევრისთვის მხოლოდ პირადი მონაცემების გადაცემა  და რამდენიმე საათი დალოდება დასჭირდება.

მოსკოვის მერიამ სავალდებულო აცრა იმის გამო შემოიღო, რომ ქვეყნის ხელისუფლება კორონავირუსის პანდემიას ვერაფრით უმკლავდება – მცირე პაუზის შემდეგ ვირუსი ქვეყანას ისევ უტევს. და ეს იმის მიუხედავად, რომ რუსეთს თავისი ვაქცინა აქვს, რომელიც ხელმისაწვდოდია ყველა მსურველისთვის.

ამ დროისთვის მოსკოვში ვაქცინირებულია მოსახლეობის მხოლოდ 15%, მთლიანად რუსეთში კი მაჩვენებელი კიდევ უფრო დაბალია  – 11,5%. ეს ყველაზე დაბალი დონეა ევროპაში – ჩრდილოეთ მაკედონიის გარდა.

ბევრ რუსს აცრის ეშინია და მათ თაღლითური სქემით სერტიფიკატის ყიდვა ურჩევნიათ. მოსკოვის მერია გაყალბებასთან ბრძოლას სხვადასხვა ხერხებით, მაგალითად, სერტიფიკატების რეგისტრაციით და QR-კოდების მინიჭებით ცდილობს. თუმცა, შავი ბაზარი აქაც მოქმედებს.

სქემაში ჩართულები არიან ჯანდაცვის სისტემაში მომუშავე ადამიანებიც, რომლებსაც ცნობების რეგისტრაციასთან და კოდების მინიჭებასთან შეხება აქვთ, ასე რომ ყალბი საბუთი რეალურისგან არაფრით განსხვავდება – ის ყველა აუცილებელ ინსტანციას არალეგალურად გადის და ბოლოს მფლობელს ხელში სრულფასოვანი სერტიფიკატი უჭირავს.

მოსკოვის მერიის ინფორმაციით, სერტიფიკატების გაყალბებასთან დაკავშირებით 24 სისხლის სამართლის საქმე აღიძრა, რამდენიმე კურიერი დაკავებულია, რუსეთის კომუნიკაციების ზედამხედველობის კომიტეტის ინფორმაციით, 150 საიტი, რომელიც ყალბ ცნობებს ყიდდა, უკვე დაიხურა.

თუმცა, ამის მიუხედავად, პრობლემა დარჩა და მოსკოვის ფიზიკის ინსტიტუტის გენური ინჟინერიის ლაბორატორიის ხელმძღვანელის პაველ ვოლჩკოვის თქმით, შექმნილ ვითარების მიზეზი რუსეთის ხელისუფლების მხრიდან არასწორი კომუნიკაციაა.

„სამთავრობო ტელეარხები უცხოურ ვაქცინების გვერდით ეფექტებზე ძალიან ბევრს საუბრობენ, თუმცა, არ ითვალისწინებენ, რომ ასეთი პროპაგანდა არა მხოლოდ დასავლეთში არსებული პრეპარატების, არამედ ზოგადად ვაქცინების მიმართ უნდობლობას აჩენს – თუ ამერიკულ და ევროპულ ვაქცინებს აქვთ ხარვეზები, სადაა გარანტია, რომ რუსულს არა აქვს?“,  – ამბობს ის.

ეს რუსეთია  – აქ მთავრობისადმი ტრადიციულ უნდობლობას ღრმა ფესვები გააჩნია.

არსებობს ასეთი ტენდენცია, განსაკუთრებით ახალგაზრდებში – თუ მთავრობა რაღაცის გაკეთებას გირჩევს, ეს ნიშნავს, რომ საპირისპიროდ უნდა მოიქცე. რუსეთში, განსაკუთრებით კი მოსკოვში, მოსახლეობა ორ ნაწილად გაიყო  – ერთი ამბობს „დიახ, ვაქცინაცია საჭიროა“, მეორე კი  – პირიქით  – „არა, არ უნდა ავიცრათ, ვაქცინა ყველას მოგვკლავს“.

მოსკოვში ძალიან ბევრია ისეთი ადამიანი, ვისაც ვაქცინაცია კატეგორიულად არ სურს – და სწორედ ეს ფენაა ყალბი სერტიფიკატების ბაზრის წახალისების მთავარი ფაქტორი.

წყარო: washingtonpost.com