რუსეთში კატასტროფული მეოთხე ტალღაა - ეს ისტორია მიუთითებს ვაქცინაციის კამპანიის ჩავარდნაზე და მთავრობის მხრიდან კორონავირუსის პანდემიისადმი არაერთგვაროვან და არათანმიმდევრულ მიდგომებზე.

აქტიური ბრძოლა პანდემიის წინააღმდეგ ქვეყანაში 2020 წლის მარტში დაიწყო, ხოლო შემოღებული შეზღუდვები ივლისში, საკონსტიტუციო ცვლილებებზე რეფერენდუმის წინ გაუქმდა.

ამ ზაფხულს მოსკოვში რესტორნებში, ბარებში და კაფეებში აუცრელებისთვის შესვლა აიკრძალა, თუმცა, რამდენიმე კვირაში ეს არაპოპულარული გადაწყვეტილება გაუქმდა.

ანალიტიკოსების აზრით, რუსების მხრიდან მთავრობის და ექიმებისადმი ტრადიციულად, ჯერ კიდევ საბჭოთა პერიოდიდან, დაბალი ნდობა ვაქცინაციისადმი სკეპტიკური დამოკიდებულების ძირითადი მიზეზია.

ასევე არსებობს მოსაზრება, რომ საყოველთაო აცრას ანტივაქსერი აქტივისტების მხრიდან სოციალურ ქსელებში გაჩაღებული დეზინფორმაციის კამპანია უშლის.

ასეა თუ ისე, რუსეთი პანდემიის ცხელ წერტილად კვლავ რჩება, და ეს მაშინ, როდესაც ვაქცინაციის შედარებით მაღალი შედეგების მქონე ქვეყნები შეზღუდვებს უკვე ხსნიან. კოვიდ-სიკვდილიანობა რუსეთში რეკორდებს ყოველდღიურად ხსნის - ოფიციალური მონაცემებით საშუალოდ დღე-ღამეში კორონავირუსისგან ქვეყანაში 1100-ზე მეტი ადამიანი იღუპება.

თუმცა, ექსპერტების აზრით, ეს ციფრები რეალობაში უფრო მაღალია. პარალელურად, საავადმყოფოებს ინფიცირებულთა მოზღვავებასთან გამკლავება უჭირთ, ბიზნესი კი ახალი შეზღუდვების შემოღებით უკმაყოფილოა.

 სექტემბრის საპარლამენტო არჩევნებამდე რუსეთის ხელისუფლება კრიზისის სიმწვავეს არასათანადოდ აფასებდა, და ეს მაშინ, როდესაც ვაქცინაციის მაჩვენებელი ქვეყანაში ერთ-ერთი ყველაზე დაბალია მსოფლიოში.

ამ დროისთვის რუსეთში მოსახლეობის დაახლოებით 35%-ა აცრილი, მაშინ, როდესაც კანადაში ეს მაჩვენებელი 74%-ს, იაპონიაში 72%-ს, საფრანგეთში 68%-ს, ბრიტანეთში 67%-ს, გერმანიაში 66%-ს, შტატებში 57%-ს შეადგენს.

“იმდენი მიწევს ადამიანებისთვის ახსნა, რომ ვირუსი საშიშია და აცრა აუცილებელია, რომ უკვე დავიღალე. მოსახლეობის მხრიდან წინააღმდეგობა უზარმაზარია“, - ამბობს ექიმი ლევ ავერბახი.

კიდევ ერთი მედიკოსი, სერგეი, რომელიც „წითელ ზონაში“ მუშაობს, არავაქცინირებული პაციენტების მიმართ არანაირ თანაგრძნობას არ განიცდის და მუშაობს მხოლოდ გაორმაგებული ხელფასის გამო.

„დღეს რაც ემართება ამ ადამიანებს - ძირითადად მათივე ბრალია. ჩვენთან ყველა პაციენტი არავაქცინირებულია. ცოტა ცინიკურად ჟღერს, მაგრამ ექიმებისთვის კორონავირუსი კარგია - მეტი დაინფიცირებული მეტ ხელფასს ნიშნავს“, - ამბობს ექიმი.

სიტუაციაზე კონტროლის დაბრუნების მიზნით, რუსეთის ხელისუფლებამ 8 ნოემბრამდე უქმეები და ნაწილობრივი ლოკდაუნი გამოაცხადა მაგრამ, როგორც ჩანს, უშედეგოდ - სახლში ჯდომის ნაცვლად მოქალაქეები დასასვენებლად თურქეთში, ეგვიპტეში, ან რუსეთის შავი ზღვის კურორტებზე მიემგზავრებიან.

რუსული სახელმწიფო ტელეარხ RT-ს გენერალურმა დირექტორმა მარგარიტა სიმონიანმა განაცხადა, რომ არავაქცინირებული ადამიამები სხვისი ბავშვების მკვლელები არიან.

„ შეგიძლიათ დაიხრჩოთ ხელოვნური ვენტილაციის აპარატებზე, იღოღოთ 70-იანი სატურაციით გაჭედილ საავადმყოფოებში - ეს თქვენი არჩევანია, მაგრამ ჩემი ქვეყნის ბავშვების სიკვდილებს ვერანაირად ვერ გაპატიებთ“, - აცხადებს ის.

თუმცა, ანალიტიკური ცენტრის R. Politik-ის დირექტორის ტატიანა სტანოვაიას თქმით, შექმნილ ვითარებაში დიდწილად დამნაშავეა ვლადიმერი პუტინის არაერთგვაროვანი სიგნალები და სავალდებულო ვაქცინაციაზე ჯიუტი უარის თქმა.

„რომელიმე სხვა ქვეყანაში რომ იყოს ისეთი საინფორმაციო კამპანია, როგორც რუსეთში, იქაც ზუსტად ასეთივე ეპიდემიოლოგიური მდგომარეობა იქნებოდა“, - მიიჩნევს ის.

washingtonpost.com