Theranos-ის ყოფილ პრეზიდენტ რამეშ (სანი) ბალვანის, პაციენტებისა და ინვესტორების მოტყუებისთვის, 13-წლიანი პატიმრობა მიესაჯა. ბრალდების მხარე კომპენსაციის სახით 800 მლნ დოლარს ითხოვს, — წერს Bloomberg-ი.
შეგახსენებთ, რომ Theranos-ის დამფუძნებელ ელიზაბეტ ჰოლმსს 2022 წლის 18 ნოემბერს პატიმრობა უკვე მიესაჯა.
პროკურატურა ბალვანისთვის 15 წლით თავისუფლების აღკვეთას ითხოვდა, ადვოკატები - შინაპატიმრობას ან პირობით გათავისუფლებას. თავად ბალვანს თავის მართლება არ უცდია.
Theranos-ი 2003 წელს შეიქმნა. ელიზაბეტ ჰოლმსის სტარტაპი ავითარებდა მოწყობილობას, რომელიც ადამიანის სისხლის წვეთის გამოყენებით პაციენტს დიაგნოზს დაუსვამდა. 2015 წელს The Wall Street Journal-მა გამოაქვეყნა გამოძიება, რომლითაც გაირკვა, რომ Theranos-ის მოწყობილობა ფიქციაა, კომპანია კი სისხლის ანალიზებს სხვა კომპანიების აპარატურაზე ატარებს. 2018 წელს Theranos-ი დაიხურა.
აშშ-ს ფასიანი ქაღალდებისა და ბირჟის კომისიამ განაცხადა, რომ ჰოლმსმა და პროექტის ყოფილმა პრეზიდენტმა რამეშ ბალვანმა კომპანიის წარმატება ინვესტორებისა და ჟურნალისტების წინაშე გააზვიადეს, რომ მეტი თანხები მოეზიდათ. მარეგულირებლის ინფორმაციით, სტარტაპმა თაღლითურად დაახლოებით 750 მილიონი დოლარი შეაგროვა.
იმ დროისთვის ინვესტორებმა Theranos-ის გამო დაახლოებით 1 მილიარდი დოლარი დაკარგეს.
როგორც უკვე აღვნიშნეთ, 2022 წელს 18 ნოემბერს სასამართლომ ბიოტექნოლოგიური სტარტაპის, Theranos-ის დამფუძნებელ ელიზაბეტ ჰოლმსს 11 წლითა და 3 თვით პატიმრობა მიუსაჯა. გარდა ამისა, ჰოლმსმა ინვესტორებს 121 მილიონი დოლარის ოდენობის ზიანი უნდა აუნაზღაუროს. ჰოლმსი სასჯელაღსრულების დაწესებულებაში 2023 წლის 27 აპრილს უნდა გამოცხადდეს, მისი ადვოკატები კი აცხადებენ, რომ განაჩენს გაასაჩივრებენ.
მოამზადა მაკა ბიბილაშვილმა