„თიბისი ბანკის“ ბრიტანელი აქციონერი ჯაფარიძე-ხაზარაძე-წერეთლის წინააღმდეგ სამართლებრივ დავას აგრძელებს. იან მალკჰოლმ ჰოკის ადვოკატის მტკიცებით, ყოფილმა ბანკირებმა „თიბისი ბანკის“ სააქციო საზოგადოება დააზარალეს და შესაბამისად, ახლა 16 მილიონ ლარზე მეტის ზარალის ანაზღაურებას ითხოვს. ბრიტანელი აქციონერის ინტერესების დამცველი დიმიტრი თორაძე მოპასუხე მხარის ადვოკატებს სატელევიზიო დებატებშიც იწვევს.

2022 წლის თებერვალში ცნობილი გახდა, რომ ბრიტანეთის მოქალაქე იან მალქოლმ ჰოქი „თიბისი ბანკის“ დამფუძნებლების, მამუკა ხაზარაძის და ბადრი ჯაფარიძის წინააღმდეგ სასამართლებრივ დავას გეგმავდა. საქმეზე 2022 წლის 17 ივნისს ქართულმა სასამართლომ სარჩელის უზრუნველყოფის მიზნით, სპეციალური განჩინება გამოსცა და მამუკა ხაზარაძეს და ბადრი ჯაფარიძეს სს “თიბისი ბანკიდან” დივიდენდის მიღება აუკრძალა, რაც თანხობრივად დაახლოებით 30 მილიონ ლარს შეადგენს.

საქმესთან დაკავშირებით დღეს ბრიფინგი გამართა იან მალქოლმ ჰოქის იურისტმა დიმიტრი ტორაძემ. მისი განცხადებით, ჰოქის მიზანია, რომ მამუკა ხაზარაძემ და ბადრი ჯაფარიძემ ბანკს დაუბრუნონ ის თანხა, რომელიც მათ წლების წინ „სამგორი M”-სა და „სამგორი თრეიდზე” გაცემული სესხებიდან მიიღეს. მისი თქმით, დღეს ეს თანხა 40 მილიონს სცდება. ტორაძის განცხადებით, თანხის ბანკისთვის დაბრუნების შემთხვევაში ბანკის კაპიტალიზაცია გაიზრდება, შედეგად სარგებელს ყველა აქციონერი, მათ შორის მისი კლიენტიც მიიღებს.

„ჩვენი მოთხოვნაა, რომ სამგორი M-სა და სამგორი თრეიდზე გაცემული სესხები, რომლებიც იმავე დღეს მოხვდა ბატონი მამუკა ხაზარაძის და ბატონი ბადრი ჯაფარიძის ანგარიშზე და რომელი სესხის მოთხოვნაც “თიბისიმ” საერთოდ დაკარგა და აღმოჩნდა რომელიღაც ოფშორული კომპანიის ხელში დაუბრუნდეს „თიბისი ბანკს”. ამ შემთხვევაში, ყველა აქციონერის აქტივების გაზრდა მოხდება და კაპიტალიზაცია იქნება ბევრად მაღალი. ყველა აქციონერის შესაბამისი წილი პროპროციულად გაიზრდება. ძირითადი თანხა ეს არის 16 664 000 დოლარი. სამართლებრივად ეს შეიძლება მოხდეს მიუღებელი შემოსავლის სახით. ეს თანხები უკვე 40 მილიონს სცდება,”- განაცხადა დიმიტრი ტორაძემ.

მამუკა ხაზარაძის და ბადრი ჯაფარიძის ადვოკატი ზვიად კორძაძე განმარტავს, რომ ქართულმა სასამართლომ გამოსცა განჩინება და მამუკა ხაზარაძესა და ბადრი ჯაფარიძეს აუკრძალა სს „თიბისი ბანკისგან” დივიდენდის აღება. ადვოკატის განმარტებით, ესეც იურიდიულ აბსურდს წარმოადგენს, რადგანაც არც მამუკა ხაზარაძე და არც ბადრი ჯაფარიძე არ არიან სს “თიბისი ბანკის” აქციონერები, შესაბამისად, ისინი სს „თიბისი ბანკისგან” დივიდენდებს ისედაც არ იღებენ.

ზვიად კორძაძის თქმით, საქართველო არ შეიძლება იყოს იან მალქოლმ ჰოქის სარჩელის განხილვის ქვეყანა, რადგანაც ის არა ქართული, არამედ ბრიტანეთში რეგისტრირებული კომპანიის აქციონერია. რაც შეეხება სარჩელის შინაარსს, მისი თქმით, იან მალქოლმ ჰოქი TBC Group PLC-ის აქციონერი მხოლოდ 2022 წლის თებერვალში გახდა, თუმცა სარჩელი 2007-2008 წლების პროცესებს შეეხება და მას არ გააჩნია არავითარი უფლება 14 წლის წინ მომხდარ მოვლენებზე იდავოს.

ადვოკატის თქმით, თავად იან მალკოლმ ჰოქს TBC PLC-ის მხოლოდ 334 აქცია ეკუთვნის, რომელთა ღირებულება დღეს 4,718 დოლარია. გაურკვეველია ზუსტად რა პარამეტრებს ეფუძნება სარჩელი რომელშიც მილიონობით თანხაზეა საუბარი, როდესაც თავად აღნიშნულ პირს 5 000 დოლარზე ნაკლები ღირებულების აქციები ეკუთვნის.