მამუკა ხაზარაძისა და ბადრი ჯაფარიძის ადვოკატი ზვიად კორძაძე ერთ-ერთ მედია საშუალებასთან საუბარში ამტკიცებს, რომ მისი დაცვის ქვეშ მყოფი პირები სააქციო საზოგადოება „თიბისი ბანკის“ აქციონერები არ არიან და შესაბამისად სასამართლოს გადაწყვეტილებას აბსურდს უწოდებს.  

მისი ეს განცხადება საქალაქო სასამართლოს მიერ გამოტანილ განაჩენს ეხება, რომლის თანახმადაც მამუკა ხაზარაძესა და ბადრი ჯაფარიძეს 30 მლნ ლარამდე მისაღები დივიდენდები დაუყადაღდა.

„სასამართლომ გამოიტანა განჩინება, რომლის მიხედვითაც მამუკა ხაზარაძეს და ბადრი ჯაფარიძეს აეკრძალათ სააქციო საზოგადოება „თიბისი ბანკში“, საიდენტიფიკაციო კოდით: 204854595, დივიდენდების აკრძალვა. ეს კოდი შემთხვევით არ წამიკითხავს. ჩვენ მივმართეთ „თიბისი ბანკსაც“, მივმართეთ სააქციო საზოგადოება „თიბისი ბანკის“ რეგისტრატორს, სადაც აქციები არის რეგისტრირებული და „თიბისი კაპიტალს“, რომელიც ნომინალურ მფლობელობაში მყოფ აქციებს ფლობს. სამივემ დაგვიდასტურა, რომ ასეთი აქციონერი „თიბისი ბანკს“ არ ჰყავს, როგორიც არის იან მალქოლმ ჰოქი. უფრო მეტიც, დღევანდელი მოცემულობით, სააქციო საზოგადოების აქციონერები არც მამუკა და არც ბადრი ჯაფარიძე არ არის. შესაბამისად, სასამართლომ გამოიტანა აბსურდული გადაწყვეტილება. იმიტომ, რომ წარმოებაში მიიღო იმ პირის სარჩელი, რომელიც არ არის „თიბისი ბანკის“ აქციონერი, მიიღეს სარჩელი როგორც „თიბისის“ აქციონერისგან, შემდეგ გამოიტანა განჩინება, რომელიც სამართლებრივი შედეგს ვერ წარმოშობს. ადამიანებს, რომლებიც არ არიან კონკრეტული იურიდიული პირის და შესაბამისი კოდის იურიდიული პირის აქციონერები, აუკრძალეს იმ დივიდენდების აღება, რომელსაც ისინი ვერ აიღებდნენ ვერასდროს“, - განაცხადა კორძაძემ.

კორძაძემ დასძინა, რომ იან მალქოლმ ჰოქი TBC Group PLC-ის აქციონერია და არა სააქციო საზოგადოება „თიბისი ბანკის”, თუმცა მის გაცემულ მინდობილობაში, რომლითაც იურისტმა საქართველოში დაიწყო პროცესი, წერია, რომ ის არის სააქციო საზოგადოება „თიბისი ბანკის” აქციონერი.

აღნიშნულ განცხადებას ბრიტანელი აქციონერის იან მალქოლმ ჰოქის ადვოკატი დიმიტრი ტორაძე გამოეხმაურა:

„თუ აქამდე ვისმენდით, რომ ჩემი მარწმუნებელი არაფერ შუაში არ იყო „თიბისი ბანკთან“, დღეს ისიც გავიგეთ, რომ თურმე არც მამუკა ხაზარაძე და ბადრი ჯაფარიძე არ ყოფილან „თიბისი ბანკის“ აქციონერები“, - აღნიშნა ტორაძემ.

ზვიად კორძაძემ, ასევე, განაცხადა, რომ მათ სარჩელი არ ჩაჰბარებიათ, რომლისთვისაც მეორე მხარეს 2 თვის ვადა აქვს. გარდა ამისა, ის კითხვით მიმართავს დიმიტრი ტორაძეს, საიდან აქვს მას განჩინება და რა კანონიერი გზით მოიპოვა ის.

„ჩვენ არც სარჩელი ჩაგვბარებია, რომლის გამოგზავნის ვალდებულება აქვს მხარეს და ამისთვის 2 თვიანი ვადა ჰქონდა და აქვს, მეორე საკითხი - განჩინებაც მას შემდეგ ავიღეთ, როცა პრესკონფერენცია ჩატარდა. კიდევ ერთი საკითხი, რომელიც მაინტერესებს, მინდა, მისმა ადვოკატმა გასცეს პასუხი, სარჩელში და უზრუნველყოფის ღონისძიების მოთხოვნაში ის ხშირად აპელირებს განაჩენზე და ციტატები მოჰყავს. საიდან აქვს მას ეს განაჩენი, მაინტერესებს, როცა ეს განაჩენი საჯაროდ არსად არ გამოქვეყნებულა. ეს ინფორმაცია აქვს პროკურატურას, ვის მიმართა, რა ფორმით და რა კანონიერი გზით მოიპოვა განაჩენი, ეს ძალიან მნიშვნელოვანი კითხვაა“, - განაცხადა კორძაძემ.

დიმიტრი ტორაძემ კორძაძის შეკითხვას დაუყოვნებლივ გასცა პასუხი და აღნიშნა, რომ ხაზარაძე-ჯაფარიძის ინტერესების დამცველი უფრო მეტი ყურადღებით რომ გასცნობოდა სარჩელს, პასუხსაც მიხვდებოდა. ტორაძის თქმით, მან ეს განჩინება ერთ-ერთი მედიასაშაულებიდან აიღო, რომელიც ზვიად კორძაძის ბიუროს ადვოკატმა კახა წიქარიშვილმა გამოაქვეყნა. ბრიტანელი აქციონერის ინტერესების დამცველმა დასძინა, რომ მან ამ საკითხთან დაკავშირებით „თიბისი ბანკსაც“ მიმართა, რადგან ამ განჩინების ასლები საჯარო სივრციდან აეღოთ.

„ყურადღებით მოვისმინე ჩემი კოლეგის პრესკონფერენცია და სატელევიზიო ჩართვა, სიმართლე გითხრათ, მეტს მოველოდი.

ბატონი ზვიადი საუბრობდა ჩემი სარჩელის ციტატებით და არგუმენტებად ტელევიზიებს აჩვენებდა თანდართულ საბუთებს და იქვე გვიმტკიცებდა, რომ სარჩელი არც კი ჩაბარებიათ. საქმე გვაქვს ან მარტივ ტყუილთან, ან კანონდარღვევასთან, რადგან გამოდის, რომ მას ეს დოკუმენტები მიაწოდა „თიბისი ბანკმა“, რომელიც, ასევე, ბატონი ზვიადის თქმით, არაფერ კავშირში არ არის მასთან.

სინამდვილეში, მათ სარჩელი ჩაჰბარდათ კიდეც და გასაჩივრების ვადაც გაუშვეს.

მეორე და ასევე, მნიშვნელოვანი. ბატონმა ზვიადმა ხაზი გაუსვა კითხვას, თუ საიდან მაქვს მე სასამართლოს განაჩენის ასლები, საიდანაც ვისარგებლე სარჩელის წარდგენისას.

მოწინააღმდეგე მხარე სარჩელს უფრო ყურადღებით რომ გასცნობოდა, იქვე ნახავდა პასუხებს ამ კითხვაზე - ამ განაჩენის ასლები მე ავიღე ერთ-ერთი მედიასაშუალებიდან, სადაც გამოქვეყნებული ჰქონდა ზვიად კორძაძის ბიუროს ადვოკატ კახა წიქარიძეს და უფრო მეტიც, მივმართე „თიბისი ბანკს“, უზრუნველყო ამ განაჩენის ასლების საჯარო სივრციდან წაშლა, ვინაიდან, ამით ირღვეოდა კონფიდენციალურობა, რაც უარყოფითად აისახება როგორც ბანკის, ასევე, ჩემი მარწმუნებლის ინტერესებზე.

მოკლედ, საღამომდე თუ კიდევ სამჯერ მოასწრებს „თიბისი“ ხაზარაძის და ჯაფარიძის უარყოფას, უკვე სამართლებრივ სივრცეს ვცდებით. სერიოზულად კი, ჩვენ ვართ იურისტები და უნდა ვისაუბროთ არგუმენტებით, რომელსაც საბოლოო ჯამში სასამართლომდე მივყავართ“, - განაცხადა ტორაძემ.

(R)