ბრიტანული გაზეთი Times-ი წერს, რომ აშშ-მა უკრაინას მწვანე შუქი აუნთო რუსეთის ტერიტორიებზე დარტყმების საწარმოებლად. ამის თაობაზე გაზეთი იტყობინება პენტაგონში საკუთარ წყაროზე დაყრდნობით.
რუსეთის ჯარების მიერ უკრაინის სასიცოცხლოდ მნიშვნელოვანი ინფრასტრუქტურის მასირებული დაბომბვების შემდეგ აშშ ნაკლებად წუხს იმაზე, რომ შორეული სამიზნეების წინააღმდეგ კიევის იერიშებმა კონფლიქტის ესკალაცია შეიძლება გამოიწვიოს. ამიტომ ამერიკამ უკრაინას უფლება მისცეს, თავად გადაწყვიტოს, როგორ გამოიყენოს მისთვის გადაცემული შეიარაღება, წერს გაზეთი.
„ჩვენ კიევს არ ვეუბნებით: ‘არ მიაყენოთ დარტყმები რუსებს [რუსეთში ან ანექსირებულ ყირიმში]’. ჩვენ მათ ვერ მივუთითებთ, რა გააკეთონ. თავად წყვეტენ, როგორ გამოიყენონ საკუთარი იარაღი. ერთადერთი, რასაც მოვითხოვთ, ისაა, რომ ჩვენ მიერ მიწოდებული იარაღის გამოყენებისას უკრაინის სამხედროებმა დაიცვან ომის საერთაშორისო კანონები და ჟენევის კონვენციები,“ იმოწმებს გამოცემა წყაროს აშშ-ის თავდაცვის სამინისტროდან.
5 დეკემბერს რუსეთის თავდაცვის სამინისტრომ განაცხადა, რომ სარატოვისა და რიაზანის ოლქებში დრონებით განხორციელდა იერიშები აეროდრომებზე, რის შედეგადაც დაიღუპა სამი სამხედრო მოსამსახურე. რუსეთის შეიარაღებული ძალების თანახმად, თავდასხმების უკან უკრაინა იდგა.
უკრაინა ოფიციალურად არ ადასტურებს მომხდართან თავის კავშირს. მაგრამ უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა დაწერა, რომ „თუკი სხვა ქვეყნების საჰაერო სივრცეში ძალიან ხშირად გაუშვებ რაღაცას, ადრე თუ გვიან უცნობი მფრინავი ობიექტები იქ დაბრუნდება, საიდანაც ისინი აფრინდა“.
აშშ
