„წინა წელთან  შედარებით, „ტკბილ ქვეყანას“ ტკბილეულზე ფასების გაზრდა დაახლოებით 8-9%-ით მოუწია“, - ამის შესახებ „კომერსანტს ,ტკბილი ქვეყნის“ კომერციულმა დირექტორმა კახაბერ ყრუაშვილმა უთხრა.  მისივე თქმით, ამის მიზეზი, ინფლაცია, ნედლეულისა და ტრანსპორტირების ხარჯების გაძვირებაა, თუმცა ყრუაშვილი აღნიშნავს, რომ ამ ყველაფრის მიუხედავად ტკბილეულის მიმართ ბაზარზე მოთხოვნა გაზრდილია და შესაბამისად კომპანიამ წინა წელთან შედარებით წარმოება 30%-ით გაზარდა.

„გაყიდვები რომ შევაფასოთ, რეალიზაცია მომატებული გვაქვს, წელს ჩვენ ახალი საამქროებიც დავამატეთ,  იმიტომ რომ ბაზრის მომარაგებას ვეღარ ვახერხებდით, შესაბამისად „ტკბილი ქვეყნის“ წარმოება 30% -ით გაიზარდა“- აღნიშნა კახაბერ ყრუაშვილმა.

ყრუაშვილმა „კომერსანტთან“ კადრების დეფიციტზეც ისაუბრა და განმარტა, რომ როგორც ყველა სექტორში მათთანაც კადრების  დეფიციტია, რის გამოც შოკოლადიანი პროდუქციის  წარმოება მცირე შეფერხებებით მიმდინარეობს.

„ახლა, როდესაც  ცხელი ამინდები დასრულდა და შოკოლადიანი პროდუქციის წარმოება დავიწყეთ, კადრების დეფიციტის გამო პროცესი ცოტა შეფერხებით მიდის, თუ ვინმეს რამის გაკეთება შეუძლია და რამე იცის აქ აღარ ჩერდება და ქვეყნიდან გარბის“ - აღნიშნა კახაბერ ყრუაშვილმა.

კომპანია „ტკბილ ქვეყანას“ ოფიციალურად ექსპორტი არც ერთ ქვეყანაში არ აქვს, თუმცა როგორც ყრუაშვილი ამბობს, მათი პროდუქცია სხვა ქვეყნებში მაინც ხვდება.

„ჩვენი პროდუქცია ასე ოფიციალურად ექსპორტზე არ გაგვაქვს, მაგრამ მაინც ბევრ ქვეყანაში მიდის. მაგალითად როდესაც საზღვარგარეთ მიდიან ძალიან ბევრს მიაქვს ყუთებით, 30-50-100 ყუთიც კი და შემდეგ იქ ანაწილებენ. მაგალითად საფრანგეთში, გერმანიაში, ინგლისში, ამერიკაშიც კი მიდის  ჩვენი ტკბილეული და ამას საკმაოდ ინტენსიური ხასიათი აქვს. თუმცა დიდ კომპანიასთან, რომელიც დიდი რაოდენობით შეისყიდის ჩვენ პროდუქციას ურთიერთობა არ გვაქვს“, - აღნიშნა კახაბერ ყრუაშვილმა

რაც შეეხება ახალ პროდუქტს, „ტკბილი ქვეყანა“ სლოვაკეთში ერთ-ერთ  ქარხანასთან იწყებს თანამშრომლობას და გეგმავს ერთობლივად  შოკოლადის  ე.წ. “ბატონჩიკის“  გამოშვებას, როგორც ყრუაშვილი აღნიშნავს, ამ ეტაპზე მოლაპარაკებები მიმდინარეობს.

„რაც შეეხება  ახალ პროდუქტს, ეს იქნება შოკოლადის პროდუქტი,  უფრო  “ბატონჩიკის“  ფორმის , სლოვაკეთში  არის  ერთ - ერთი  ქარხანა,  რომელთანაც ვაწარმოებთ მოლაპარაკებებს და ვგეგმავთ  რომ  ერთობლივად  ვაწარმოოთ  ეს  პროდუქტი,  საქართველოში  სიახლეა, თუმცა ევროპაში გაყიდვაშია, ხუთშაბათს  გვაქვს  დასკვნითი  შეხვედრა და დავიწყებთ  სამუშაოებს“, - აღნიშნა კახაბერ ყრუაშვილმა.

თაკო კვაჭანტირაძე