„ტოიოტა ცენტრი თეგეტას“ როლი მსოფლიოს რუკაზე - ნულოვანი ემისია და მომსახურების უმაღლესი სტანდარტები - ეს ის მიზნებია, რომლებისკენ სწრაფვასაც კომპანია ახალი მენეჯმენტით უფრო აქტიურად გეგმავს. რამდენიმე კვირაა, რაც კომპანიის გენერალური დირექტორის თანამდებობა მარიამ მელიაშვილმა დაიკავა, გაყიდვების შემდგომი მომსახურების დირექტორად კი არჩილ მჭედლიშვილი დაინიშნა. თითქმის 1 წელია, რაც ცენტრის აღმასრულებელი დირექტორის როლს ლიკა ბერუაშვილი ასრულებს.
ცენტრის მიზნებსა და სამომავლო გეგმებზე „კომერსანტთან“ სწორედ კომპანიის განახლებული მენეჯმენტი საუბრობს.
„ტოიოტა ცენტრი თეგეტას“ ახალი გენერალური დირექტორი, მარიამ მელიაშვილი ამბობს, რომ მისი მთავარი მიზანი განვითარებისკენ სწრაფვა იქნება: „ტოიოტა მსოფლიოს უმსხვილესი ავტომწარმოებელი კომპანიაა, რომლის წარმატების ერთ-ერთი საიდუმლო კაიზენის ფილოსოფიისადმი ერთგულებაა, რომელიც სრულყოფილებისაკენ მუდმივ სწრაფვას გულისხმობს. ამ ხედვის ნაწილია ის ამბიციური გეგმა, რომლის მიხედვითაც კომპანიის მიერ 2050 წლისთვის წარმოებული ავტომობილების 90% ნულოვანი ემისიის უნდა იყოს. იმის გათვალისწინებით, რომ ჰიბრიდულ ძრვაზე მომუშავე პირველი ავტომობილი სწორედ ტოიოტას სამოდელო რიგში გაჩნდა, კომპანიის სამომავლო მიზნებიც სრულიად სარწმუნო და რეალურია“.
ახალ დირექტორს კომპანიაში სხვადასხვა პოზიციაზე მუშაობის მრავალწლიანი გამოცდილება აქვს და ბრენდის სტანდარტებსა და მოთხოვნებს კარგად იცნობს. გეგმავს, კიდევ უფრო შეუწყოს ხელი გარემოზე ზემოქმედების შემცირებას და ქართულ ბაზარზე ტოიოტას ჰიბრიდული მოდელების პოპულარიზაციას.
„ჰიბრიდული ავტომობილების გაყიდვების ტენდენცია საქართველოში მკვეთრად იზრდება, წლევანდელი წელი კი რეკორდული აღმოჩნდა. რაც მთავარია, ჰიბრიდული ავტომობილების სეგმენტში ტოიოტა ბაზრის ლიდერია“, - მარიამ მელიაშვილი, „ტოიოტა ცენტრი თეგეტას“ გენერალური დირექტორი.
ახალ პოზიციაზე კომპანიის გენერალური დირექტორის მთავარ გამოწვევად გლობალურ ბაზრებზე პანდემიის პერიოდში შექმნილი დეფიციტი რჩება.
„სხვადასხვა კომპონენტის, მათ შორის ნახევარგამტარების წარმოების პრობლემა, სამწუხაროდ, სრულად აღმოფხვრილი არ არის. ამას ემატება ლოგისტიკური საკითხები, შეფერხება გადაზიდვებში. მნიშვნელოვანია, რომ მომხმარებელს შევთავაზოთ ალტერნატივა და გლობალური შეფერხებით გამოწვეული დისკომფორტი მინიმუმამდე შევამციროთ. ერთი მხრივ, ვცდილობთ, თადარიგი დავიჭიროთ და საჭირო რაოდენობის შეკვეთები წინასწარ გავაკეთოთ. მეორე მხრივ კი, ვფიქრობთ, ეს დანაკლისი მეორადი ავტომობილებით შევავსოთ, რომელთა შემოწმება და შეკეთება ტოიოტას ოფიციალური პროგრამის - Approved Used-ის ფარგლებში ხდება.
მაქსიმალურად ვცდილობთ, რომ ავტოინდუსტრიის მიმართულებით მსოფლიოში არსებული პრობლემები ჩვენს მომხმარებელს ნაკლებად შეეხოს. ამისათვის არაერთ მნიშვნელოვან ბიზნესგადაწყვეტილებას ვიღებთ. თუმცა გასათვალისწინებელია ისიც, რომ, ჩიპების დეფიციტთან ერთად, ტოიოტას ყველა მოდელზე განსაკუთრებითაა გაზრდილი მოთხოვნა, რაც მოლოდინის რეჟიმს გარკვეულწილად ზრდის. იმედს ვიტოვებთ, რომ უახლოეს პერიოდში ეს შეფერხებაც აღმოიფხვრება და ყველა მსურველს საკუთარი რჩეული ტოიოტას შეძენა უმოკლეს დროში შეეძლება.
ამასთანავე, გეგმაში გვაქვს ავტომობილთან დაკავშირებული პროდუქტების უფრო მეტად განვითარება. მომხმარებელს უნდა ჰქონდეს შესაძლებლობა, მარტივად, ერთ სივრცეში მიიღოს ნებისმიერი მომსახურება, დაზოგოს დრო და მიიღოს სანდო, მაღალი ხარისხის სერვისი“, - მარიამ მელიაშვილი, „ტოიოტა ცენტრი თეგეტას“ გენერალური დირექტორი.
გლობალურ პრობლემებს აჯამებს „ტოიოტა ცენტრი თეგეტას“ აღმასრულებელი დირექტორიც. ლიკა ბერუაშვილის თქმით, სიტუაცია ნელ-ნელა უმჯობესდება.
„დღეს უკვე დანამდვილებით შეგვიძლია შევაფასოთ და სიამაყით ვთქვათ, რომ მოულოდნელ კრიზისს გავუმკლავდით. შექმნილი სიტუაციის მიუხედავად, არც ერთი შეკვეთა არ გაგვიუქმებია. ვიმუშავეთ ონლაინმიმართულებების მეტად განვითარებაზე, როგორც გაყიდვების, ისე შემდგომი მომსახურების კუთხით.
მოხარულები ვართ, რომ ჩვენს ძალისხმევას უშედეგოდ არ ჩაუვლია და 2020 წლის მაისში „ტოიოტა ცენტრი თეგეტამ“ 100 ერთეული ავტომობილი გაყიდა ონლაინ. ეს წარმატება კი იმის მანიშნებელი იყო, რომ უფრო მეტად უნდა ვკონცენტრირებულიყავით ამ მიმართულებით კომუნიკაციის დახვეწაზე. მიუხედავად იმისა, რომ 2022 წლის დასაწყისიდან სიტუაცია საგრძნობლად გაუმჯობესდა, პანდემიის კვალი ჯერჯერობით ისევ იგრძნობა, მასთან ერთად კი გარკვეულმა კუნძულოვანმა ჩაკეტვებმა, მაგალითად შანხაიში, წარმოების შეფერხება გამოიწვია, რაც საბოლოო ჯამში მიწოდების ვადებზე აისახა“.
„ტოიოტა ცენტრი თეგეტა“ ბაზარზე 2014 წლიდან ოპერირებს და ამ პერიოდის განმავლობაში მომხმარებლების ნდობაც მოიპოვა როგორც სერვისის, ისე ავტომობილების გაყიდვის მიმართულებით.
„ტოიოტას საერთაშორისო სტანდარტების სრულყოფილად შესრულებისთვის, ჩვენ არაერთი ჯილდო გვაქვს მიღებული. ევროპელი და იაპონელი კოლეგების შეფასებით, „ტოიოტა ცენტრი თეგეტა“ „ტოიოტა ევროპის“ მიერ დადგენილ სტანდარტებს 100%-ით აკმაყოფილებს. სწორედ ესაა ის მაღალი ხარისხი, რომლისკენ სწრაფვასაც არ ვწყვეტთ.
ახალი არ არის, რომ ტოიოტას ავტომობილები განსაკუთრებულად მოთხოვნადია როგორც მსოფლიო, ისე ქართულ ბაზარზე. ისინი მოთხოვნადია რამდენიმე მახასიათებლის გამო: ტოიოტამ ყველა დაარწმუნა, რომ მისი მანქანები არის სანდო, უსაფრთხო, გამძლე და ამასთანავე, ბიუჯეტური. ვცდილობთ, მომხმარებლის კომფორტზე იყოს მორგებული ის მომსახურებაც და პროდუქტებიც, რასაც მათ ვთავაზობთ“, - ლიკა ბერუაშვილი, „ტოიოტა ცენტრი თეგეტას“ აღმასრულებელი დირექტორი.
„ტოიოტა ცენტრი თეგეტა“ ბაზარზე განსაკუთრებული პროდუქტებითაც გამოირჩევა. იაპონური ბრენდის უახლესი ავტომობილებისა და სრულყოფილი სერვისის გარდა, კომპანია მომხმარებელს მათზე მორგებულ პროდუქტებს სთავაზობს:
„მნიშვნელოვანია „Trade in“ პროექტი, რომლის ფარგლებშიც მომხმარებელს საბაზრო ღირებულებით მისი კუთვნილი ნებისმიერი მარკისა და მოდელის ავტომობილის ჩვენთვის ჩაბარება და ცენტრიდან მისთვის სასურველი ახალი ტოიოტას გაყვანა შეუძლია. ახალი ან მეორადი ავტომობილის შეძენა შესაძლებელია ტოიოტას სალიზინგო პროდუქტის „ტოიოტა იზის“ საშუალებით, ასევე მომხმარებელს აქვს შესაძლებლობა, ისარგებლოს ტოიოტას ახალი სადაზღვევო პროდუქტით „ტოიოტა კასკოთი“ და მშვიდად იმგზავროს დაზღვეული ავტომობილით“, - ლიკა ბერუაშვილი, „ტოიოტა ცენტრი თეგეტას“ აღმასრულებელი დირექტორი.
„ტოიოტა ცენტრი თეგეტა“ საქართველოს ბაზარზე უმსხვილესი ავტოსერვისის მიმწოდებელია. ამ თვალსაზრისით კი კომპანია კადრების მუდმივ ზრდასა და განვითარებაზე მუშაობს. „კომერსანტთან“ ინტერვიუში „ტოიოტა ცენტრი თეგეტას“ გაყიდვების შემდგომი მომსახურების დირექტორი, არჩილ მჭედლიშვილი კომპანიის მომსახურებაზე აკეთებს აქცენტს.
„ჩვენი მთავარი უპირატესობა ისაა, რომ „ტოიოტა ცენტრი თეგეტაში“ მომხმარებელს ყველა საჭირო სერვისი ერთ სივრცეში შეუძლია მიიღოს. ჩვენი სერვისი თვეში 2000 ავტომობილს ატარებს და მათი უმრავლესობა სწორედ ტოიოტასა და ლექსუსის ბრენდია. ჩვენთან მომსახურება ორ ნაწილად არის გაყოფილი, ერთია გეგმური სერვისები, რომელთა ნაწილშიც ავტომობილისთვის საჭირო ყველა მომსახურებას ვფარავთ, მეორე კი - ჩვენი გამორჩეული სამღებრო-სათუნუქე უბანი, სადაც 6 ძირითადი ოთახი გვაქვს და თანამედროვე ტექნოლოგიების დახმარებით ყველა საჭირო სერვისი უმაღლესი ხარისხით ხორციელდება“, - არჩილ მჭედლიშვილი, „ტოიოტა ცენტრი თეგეტას“ გაყიდვების შემდგომი მომსახურების დირექტორი.
„ტოიოტა ცენტრი თეგეტაში“ ამბობენ, რომ მათი ყველა მექანიკოსი სერტიფიცირებულია და ისინი შესაბამის მომზადებას გადიან.
„ჩვენ ვთანამშრომლობთ „თეგეტა აკადემიასთან“, სადაც ჩვენთვის კადრების ამზადებენ. შემდეგ, ისინი გადიან პრაქტიკულ სწავლებას. მათი სერტიფიცირება კი „ტოიოტა კავკასიაში“ ხდება. ჩვენთვის მნიშვნელოვანია, რომ ყველა თანამშრომელს შესაბამისი კვალიფიკაციის სერტიფიკატი ჰქონდეს. ეს პროცესი 4-ეტაპიანია და სიამაყით გეტყვით, რომ ჩვენ ორი მასტერ ტექნიკოსი გვყავს, რომლებსაც ყველა ეტაპი წარმატებით აქვთ გავლილი. სერტიფიცირებული მექანიკოსების ყოლა კი, თავისთავად, მომხმარებლისთვის ხარისხიანი და სანდო მომსახურების მიწოდებას გულისხმობს. გარდა ამისა, ვმუშაობთ დამატებითი სერვისების შექმნაზე, რაც „ტოიოტა ცენტრი თეგეტას“ მომხმარებელს შესაძლებლობას მისცემს, კიდევ უფრო მარტივად იზრუნოს ავტომობილზე“, - არჩილ მჭედლიშვილი, „ტოიოტა ცენტრი თეგეტას“ გაყიდვების შემდგომი მომსახურების დირექტორი.
მენეჯმენტის ახალი შემადგენლობა „ტოიოტა ცენტი თეგეტას“ ამბიციური გეგმების განხორციელებას უკვე შეუდგა და წლის ბოლომდე მომხმარებელს ბევრ საინტერესო პროექტს ჰპირდება.
(R)