ეკონომიკისა და მდგრადი განვითარების მინისტრის მოადგილე რომეო მიქაუტაძე კომპანია „თელასს" ეწვია და ზამთრის მოსამზადებელ სამუშაოებს გაეცნო. კომპანიის თანამშრომლებთან შეხვედრაზე რომეო მიქაუტაძემ განაცხადა, რომ ენერგეტიკოსის პროფესია ერთ-ერთი ყველაზე საჭირო და მნიშვნელოვანია და „თელასის“ თანამშრომლები ყველაფერს აკეთებენ იმისთვის, რომ თბილისი გაანათონ.

„თქვენ ყველაფერს აკეთებთ იმისთვის, რომ თბილისი გაანათოთ და თბილისელების სახელით, მინდა დიდი მადლობა გადაგიხადოთ. კომპანიის წარმატება განპირობებულია სწორედ თანამშრომლების თავდაუზოგავი შრომით. „თელასში" მრავალი თაობა აღიზარდა. ადამიანები ეუფლებიან პროფესიას და ცოდნას მომავალ თაობებს გადასცემენ. რაც შეეხება მომავალს, მინდა გამოვთქვა იმედი, რომ კომპანიის მუშაობა ყოველთვის იქნება მიმართული თბილისის გამანაწილებელი ქსელის სრულყოფაზე და განვითარებაზე, მომხმარებელთა მომსახურების ხარისხის გაუმჯობესებასა და საიმედო ენერგომომარაგებაზე," - განაცხადა მინისტრის მოადგილემ და კომპანიის თანამშრომლებს გაწეული საქმიანობისთვის მადლობა გადაუხადა.

კომპანიის ხელმძღვანელობასთან ერთად, მინისტრის მოადგილემ „თელასის" ცენტრალური სადისპეტჩერო დაათვალიერა, რომელიც ემსახურება ელექტროენერგიის მიწოდების კონტროლს ქვესადგურებში მაღალი ძაბვის 110 -35 კვტ ხაზების საშუალებით. ელექტროენერგია მიეწოდება თბილისის 700,000-მდე  მომხმარებელს. აღინიშნა, რომ ამჟამად მიმდინარეობს ცენტრალური სადისპეტჩეროს მოდერნიზებისა და თანამედროვე სისტემის SCADA-ს დანერგვის სამუშაოები, რომელიც მართვას უფრო სრულყოფილს გახდის. ახალი სისტემის დანერგვა 2024 წლისთვის დასრულდება.

მინისტრის მოადგილე ასევე გაეცნო „თელასის" მრიცხველების თანამედროვე ლაბორატორიის მუშაობას, სადაც შემოწმებას გადის როგორც ელექტრონული, ისე მრავალფუნქციური სმარტ მრიცხველები, ხოლო დამოწმებას მეტროლოგიის სამსახური ახორციელებს. აღნიშნულ ლაბორატორიაში მოწმდება ასევე როგორც ახალი, ასევე მომხმარებელთა მრიცხველები.