დონალდ ტრამპი გახდა აშშ-ს პირველი ყოფილი პრეზიდენტი, რომელსაც სისხლის სამართლის ბრალდება წაუყენეს. ამის შესახებ Euronews-ი წერს.
მანჰეტენის ნაფიცმა მსაჯულებმა 76 წლის დონალდ ტრამპს ბრალი წაუყენა იმის გამო, რომ მან, 2016 წლის საპრეზიდენტო კამპანიის დროს, პორნოვარსკვლავს, რომანის შესახებ დუმილის სანაცვლოდ, ფული გადაუხადა.
საუბარია სტორმი დენიელსისთვის 130 დოლარის გადახდაზე. ვარაუდობენ, რომ ადვოკატმა მაიკლ კოენმა ეს ტრამპის სახელით გააკეთა. ამავდროულად, პოლიტიკოსს ბრალს სდებენ არა თავად თანხის გადახდაში, არამედ იმაში, რომ მან ის თანხა თითქოს პოლიტიკურ კამპანიას მოახმარა, რაც შეიძლება თაღლითობად შეფასდეს. თავად ექს-პრეზიდენტი უარყოფს როგორც დანიელსთან კავშირს, ასევე მის კავშირს თანხის გადახდასთან.
სოციალურ ქსელში ტრამპმა მის წინააღმდეგ წაყენებულ ბრალდებას პოლიტიკური დევნა და არჩევნებში ჩარევა უწოდა.
„სამართლებრივი თვალსაზრისით, ეს საქმე გავლენას ვერ მოახდენს 2024 წლის საპრეზიდენტო არჩევნებზე. თუ ტრამპი გაიმარჯვებს, მოქმედი პრეზიდენტის სისხლისსამართლებრივი დევნა შეუძლებელია, საქმე უნდა შეწყდეს. მაგრამ არჩევნებამდეც რომ გაასამართლონ ტრამპი, ეს ბრალდებები ხელს არ შეუშლის მას დაიკავოს საჯარო თანამდებობა“, აცხადებს ყოფილი ფედერალური პროკურორი ნიმა რაჰმანი Euronews-თან.
არაერთი ცნობილი რესპუბლიკელი, მათ შორის პალატის სპიკერი კევინ მაკკარტი, ეწინააღმდეგებოდა ტრამპის სასამართლო პროცესს და მანჰეტენის ოლქის პროკურორი ელვინ ბრეგი პოლიტიკურ ძალადობაში დაადანაშაულა.
ამავე დროს, სენატის უმრავლესობის ლიდერმა ჩაკ შუმერმა გამოაქვეყნა განცხადება, რომელშიც ნათქვამია, რომ „ტრამპი უნდა დაექვემდებაროს იგივე კანონებს, როგორც ყველა ამერიკელი“.
ყოფილი პრეზიდენტი დონალდ ტრამპი სასამართლოში სამშაბათს წარდგება. პროცესს მოსამართლე ხუან მერკანი უხელმძღვანელებს, განაცხადა CNN-მა რამდენიმე წყაროზე დაყრდნობით.