ენერგეტიკისა და სურსათის უსაფრთხოების უზრუნველყოფის კონტექსტში, ტრანსკასპიური საერთაშორისო სატრანსპორტო მარშრუტი სულ უფრო მნიშვნელოვანი ხდება, განაცხადა ყაზახეთის პრეზიდენტმა კასიმ-ჟომარტ ტოკაევმა.
„მინდა აღვნიშნო ინიციატივის „სარტყელი და გზა“ მნიშვნელობა, რომლის განხორციელებაშიც განსაკუთრებული ადგილი ყაზახეთს უჭირავს. გარდა ამისა, ტრანსკასპიური საერთაშორისო სატრანსპორტო მარშრუტი, რომელიც ასევე ცნობილია როგორც შუა დერეფანი, ენერგეტიკისა და სურსათის უსაფრთხოების უზრუნველყოფის კონტექსტში, სულ უფრო მნიშვნელოვანი ხდება,“ განაცხადა ტოკაევმა საგარეო დიპლომატიური მისიების ხელმძღვანელებთან შეხვედრისას.
ყაზახეთის პრეზიდენტის თქმით, ამჟამად ჩინეთ-ევროპის დერეფნის გასწვრივ სახმელეთო სატრანზიტო მიმოსვლის 80%-ზე მეტი ყაზახეთის ტერიტორიაზე გადის.
„მსოფლიო ბანკის მონაცემებით, სატრანზიტო და სატრანსპორტო პოტენციალის განვითარებას შეუძლია ცენტრალური აზიის ქვეყნების მშპ-ს კუმულატიურ ზრდას 15%-ით შეუწყოს ხელი,“ განაცხადა ტოკაევმა.