ტრანსკასპიური საერთაშორისო სატრანსპორტო მარშრუტით ყაზახეთის ექსპორტის მოცულობა, მათ შორის ჩინეთიდან ტვირთების გადაზიდვა გაიზრდება, ამიტომ ქართულ მხარესთან თანამშრომლობა საქართველოს ტერიტორიაზე ტრანზიტის მოხერხებულობის სფეროში უნდა განვითარდეს. ამის შესახებ ყაზახეთის მრეწველობისა და ინფრასტრუქტურის განვითარების მინისტრ კაირბეკ უსკენბაევმა თავის Telegram-არხზე დაწერა, რასაც „კაზინფორმი“ ავრცელებს.

„ტრანსკასპიური მარშრუტი ქართული საექსპორტო ვაჭრობის შემდგომი გაფართოების კატალიზატორი გახდება,“- წერს მინისტრი.

კაირბეკ უსკენბაევმა დააანონსა, რომ კასპიის ზღვაზე ოთხი ბორნის მშენებლობას იგეგმება, რაც ხელს შეუწყობს აღნიშნულ მარშრუტზე ხელსაყრელი კონკურენტული ტარიფის დაწესებას. მინისტრმა ხაზგასმით აღნიშნა, რომ ყაზახეთსა და საქართველოს ურთიერთ ვაჭრობის გაზრდის მნიშვნელოვანი პოტენციალი აქვთ. ყაზახური კომპანიები მზად არიან, ზოგიერთი ინდუსტრიის, მათ შორის მეტალურგიული, ნავთობქიმიური, კვების, საინჟინრო და ფარმაცევტულ ინდუსტრიების გადამუშავებული საქონლის ექსპორტი გაზარდონ. მინისტრის მონაცემებით, მთლიანი საექსპორტო პოტენციალი 170 მლნ დოლარად არის შეფასებული.

მისი თქმით, ყაზახეთი მზად არის, წარმოადგინოს ექსპორტიორი საწარმოების სია და ეკონომიკის სხვადასხვა სექტორის 40 დასახელების პროდუქტზე ექსპორტი გაზარდოს. უსკენბაევი წერს, რომ ყაზახი მარცვლეულის ექსპორტიორები მზად არიან, საქართველოს ხორბალი საბაზრო საფუძველზე მიაწოდონ. ყაზახეთი ქართველ იმპორტიორებს სთავაზობს, მონაწილეობა მიიღონ ხორბლის, მზესუმზირისა და სხვა კულტურების ფორვარდულ შესყიდვებში მათი შემდგომი ექსპორტის მიზნით.

მინისტრის თქმით, ქართულ-ყაზახურ მხარეებმა 2022 წლისთვის საავტომობილო ტრანსპორტით ტვირთის გადაზიდვის სანებართვო ფორმები გაცვალეს, ხოლო 2023 წლისთვის წინასწარი კვოტა დაადგინეს. გარდა ამისა, ყაზახურმა მხარემ ქართულ ავიაკომპანიებს ყაზახეთის მიმართულებით რეგულარული ფრენების დაწყება შესთავაზა. უსკენბაევის ცნობით, ამჟამად საქართველოს მიმართულებით 19 რეგულარულ რეისს ყაზახური ავიაკომპანიები, Air Astana, Fly Arystan და SCAT ახორციელებენ.

როგორც ცნობილია, საქართველომ, აზერბაიჯანმა, თურქეთმა და ყაზახეთმა ტრანსკასპიური საერთაშორისო სატრანსპორტო დერეფნის განვითარების შესახებ ოთხმხრივ შეთანხმებას 31 მარტს მოაწერეს ხელი.

წყარო: "ბიზნესპრესნიუსი"