მდგომარეობა რთულია და თუ ასე გაგრძელდა დარგი გაჩერდება - ამის შესახებ ,,ბიზნესპრესნიუსთან“ წისქვილკომბინატ ,,ბარაქას“ დირექტორი, ლადო ბიძინაშვილი ამბობს.

სექტორი რთული მდგომარეობის წინაშე, რუსეთის მიერ ხორბალზე დაწესებულმა მცურავმა საბაჟო გადასახადმა დააყენა, რომელიც ბოლო პერიოდში მუდმივად მზარდია. ბიძინაშვილის თქმით, უწყებათაშორისი საბჭოს ფორმატში მიმდინარეობს მსჯელობა, რა შეიძლება იყოს გამოსავალი.

„უწყებათაშორისი კომისიის ფარგლებში მოლაპარაკებები ყოველკვირეულად მიმდინარეობს, რა შეიძლება მოხდეს, რა შეიძლება ვქნათ. ამ ეტაპზე გამოკვეთილი შედეგი არ არის. სიმართლე გითხრათ, ჩვენ პირდაპირ ვერანაირ გამოსავლის გზას ვერ ვთავაზობთ. ჩვენ ვამბობთ ფაქტს, რომ მდგომარეობა რთულია და თუ ასე გაგრძელდა, დარგი გაჩერდება. რა გავაკეთოთ, ალბათ, უფრო კომპეტენტურმა ორგანოებმა უნდა შემოგვთავაზონ, რომ რაღაც შეღავათი გვქონდეს.

ჯერჯერობით არ ვიცით, მაგრამ ნელნელა იძულებული ვხდებით რაღაც სხვა ალტერნატივა მოვიფიქროთ. ეს ფქვილის იმპორტი იქნება თუ სხვა ბიზნესზე გადაწყობა, არ ვიცით. რეალობა ასეთია - იმდენად დიდი სხვაობაა იმპორტირებულ და ადგილობრივ წარმოებულ ფქვილს შორის, რომ კონკურენციას ადგილობრივი ბაზარი ფიზიკურად ვერ უძლებს. ამიტომ, ყველას მოგვიწევს სხვა, ალტერნატიული გზების პოვნა. შედეგად, კონკრეტულად ჩვენი ბიზნესის დახურვით 120 ადამიანი დარჩება უმუშევრად, სექტორის გაჩერებით კი 5 000-ზე მეტი ადამიანი. საკმაოდ დიდი ჯაჭვია, ამას პლიუს გადამზიდავები და დამხმარე დარგები“- აცხადებს ,,ბარაქას“ დირექტორი.

ინფორმაციისთვის, სექტემბერში ფქვილის იმპორტი 7-ჯერ გაიზარდა. რაც შეეხება 9-თვიან მაჩვენებელს, მიმდინარე წლის იანვარ-სექტემბრის პერიოდში ქვეყანამ 16 430 ტონა (4.897 მლნ აშშ დოლარი) პროდუქტის იმპორტი განახორციელა. მთავარი იმპორტიორი ქვეყანა კი, კვლავ რუსეთია, საიდანაც საქართველოში 9 თვეში 15 801 ტონა 4.614 მლნ აშშ დოლარის ფქვილი შემოვიდა.

რაც შეეხება ხორბალს, 2021 წლის იანვარ-სექტემბერში საქართველოში 67.8 მლნ აშშ დოლარის 282,866 ტონა ხორბლის იმპორტი განხორციელდა. 2020 წლის ანალოგიურ პერიოდში კი, 80.3 მლნ დოლარის 368,746 ტონა ხორბლის.

Bpn.ge