როგორ ხდება რეგულაციების დაცვა რესტორნებში და რა მდგომარეობაშია სარესტორნო ბიზნესი პანდემიით გამოწვეული შეზღუდვების ფონზე? - კომერსანტის დილაში, შეფ-მზარეული, რესტორნების ქსელ „ჩვენი“-ს დამფუძნებელი, გურამ ბაღდოშვილი საუბრობს.
„დღეს რესტორანში უფრო მეტი რეგულაციაა დაცული, ვიდრე ნებისმიერ მოლში, ჰოსპიტალში, სახელმწიფო სტრუქტურასა და მინიმარკეტებში. ჩვენ ვიცავთ 2 მეტრიან დისტანციას, 50%-ით გვაქვს დასასხდომი ადგილები შემცირებული, არსებობს თერმოსკრინინგი, დეზინფექცია, აღწერა ადამიანების და ჯავშნების რეგისტრაცია.
სახელმწიფო და ეკონომიკა სერიოზული პრობლემების წინაშე დადგა. ჩვენთვის პრობლემურია დიდი გადასახადები, ნული ტურისტი, შიდა ბაზარზე შეცვლილი მომხმარებლის ქცევა. ასევე, უშუალოდ რეგულაციები,რომლებმაც შეგვავიწროვა და ფიზიკურად ვეღარ ვამუშავებთ რესტორნებს, გვიწევს კადრების და ხელფასების შემცირება. პირველივე ლოქდაუნზე რესტორნების 50% დაიკეტა.
პროგნოზები ძალიან რთულია. ერთი კვირის პროგრამის შემუშავებაც კი რთულია, ყოველ 2-3 დღეში ერთხელ იცვლება ვითარება, უფრო მეტი კოვიდინფიცირებული გვყავს და ბევრს ეშინია საზოგადოებრივ დაწესებულებებში თავშეყრა“- ამბობს გურამ ბაღდოშვილი.
სარესტორნო ბიზნესის წარმომადგენლები სახელმწიფოსგან მხარდაჭერას ითხოვენ. გურამ ბაღდოშვილის თქმით, სექტორში ბევრი კომპანია უკვე გაკოტრებულია და მნიშვნელოვანია, სახელმწიფო შეხვდეს სექტორის წარმომადგენლებს, ერთობლივად მოხდეს გადაწყვეტილებების მიღება და სექტორის გაჯანსაღება.
„ჩვენს სექტორში 300 ათასი ადამიანია დასაქმებული, მეტი თუ არა. ისინი ინახავენ 3-4 შვილს, ჩამოდიან სხვადასხვა რეგიონებიდან, ქირაობენ ბინას და საქმდებიან. სექტორებს შორის ყველაზე დიდი ჯაჭვური გადაბმა გვაქვს სახეზე. ჩვენი ქვეყნის ეკონომიკა აგებულია ტურიზმზე, რომელზეც მიბმულები არიან ივენთმენეჯერები, სალონები. რამდენიმე კომპანიამ მილიონობით დოლარი ჩადო იმისთვის,რომ იმპორტ-ექსპორტის ბაზარი განევითარებინა საქართველოში. ახლა ეს ბაზარი გაჩერებულია და გაკოტრების პირას არის. კომპანიებს 10-15 მილიონი აქვთ მომწოდებლების დავალიანება. ისინი უკვე გაკოტრებულები არიან.
დიდი იმედი მაქვს,რომ სახელმწიფო მხარში დაუდგება სექტორს, ეცდება დაწიოს კომუნალური გადასახადები, გააჩეროს ან დაგვიწიოს დაბეგვრის გადასახადი, დაალაგოს საბანკო სისტემა, იმიტომ რომ ბევრ ადამიანს ,ფაქტობრივად, ცხოვრება აქვს ჩადებული. თუ ჩვენ გავკოტრდებით, სახელმწიფოს ეკონომიკაც გაკოტრდება. არ ვაზვიადებ და შემიძლია ნებისმიერ ადამიანს დავუმტკიცო,რომ საქართველოს ეკონომიკა არის სტუმარმასპინძლობის სექტორზე დამოკიდებული.
მინდა ყველას ჯანმრთელობა და წარმატება ვუსურვო, იმედია სახელმწიფო სტრუქტურები დაფიქრდებიან, დაგვიძახებენ და ჩვენთან ერთად გავილიან ყველა არსებულ პრობლემას, რათა დალაგდეს სექტორი და შესაბამისად, გადარჩეს ჩვენი ქვეყანა.
მჯერა, როგორც კი დასრულდება ეს ყველაფერი, ჩვენი ქვეყანა დაუბრუნდება ტურიზმის პოპულარიზაციის, განვითარების აქტიურ ტემპს და ტურისტების მოძიებას. როგორც ჩემთვის ცნობილია, ჩვენით დაინტერესებულია იაპონია. რამდენიმე ადამიანი მუშაობდა იმისთვის,რომ იაპონელი ტურისტი ჩამოსულიყო საქართველოში, მაგრამ მოხდა, რაც მოხდა,“-ამბობს გურამ ბაღდოშვილი.