რეფერენტული ფასების შემოღება 2023 წლის იანვრიდან, ქრონიკული და ონკოლოგიური დაავადებების სამკურნალო მედიკამენტებზე იგეგმება. „წამლისა და ფარმაცევტული საქმიანობის შესახებ“ საქართველოს კანონში შესატან ცვლილების მიხედვით, რეფერენტული ფასები პირველ ეტაპზე დაახლოებით 1000-1200 მედიკამენტს შეეხება, წლის ბოლომდე კი მთელ ფარმაცევტულ ბაზარზე უნდა გავრცელდეს. ფასები სხვადასხვა ქვეყნის ფასების მიხედვით დაანგარიშდება, რეფერენტულ ქვეყნებად ლატვია, მონტენეგრო, ბულგარეთი და ჩრდილოეთ მაკედონიაა შერჩეული. 

ფარმაცევტული კომპანიების ასოციაციის დირექტორი ირაკლი მარგველაშვილი ამბობს, რომ თუ ფასი სწორად არ დაწესდა კომპანიების ნაწილმა შესაძლოა მედიკამენტების საქართველოს ბაზარზე შემოტანის ინტერესი დაკარგონ.

„მნიშვნელოვანია, რამდენიმე მნიშვნელოვან კითხვას გაეცეს პასუხი, მაგალითად რამდენად სწორად დავიწყებთ საპილოტე ნაწილს, კონკრეტულად რა ფორმულით იქნება კალკულირებული, იქნება თუ არა, სხვაობა ორიგინალ და ჯენერიკ მედიკამენტებს შორის, წამლების რა კატეგორიებზე გავრცელდება, ასევე, რა მიდგომა იქნება იმ მედიკამენტებზე, რომლებიც უკვე შემოტანილი და დასაწყობებულია, ანუ რამოდენიმე თვის მარაგები არსებობს. იმ ქვეყნებში არის შესაძლებლობა, ადამიანი რასაც სახელმწიფოს დაფინანსებით იღებს, იმ მედიკამენტების აღება შეუძლია ყოველგვარი თანაგადახდით, მაგრამ თუ მას უნდა სხვა მედიკამენტი, მაშინ საშუალება ეძლევა, რომ თვითონ დაამატოს, ეს მოდელი ალბათ ყველაზე კარგი იქნება, იმისათვის რომ მთავარი პრობლემა არ შეიქმნას. ეს პრობლემა კი არის ის, რომ რომელიმე მედიკამენტი ბაზრიდან არ გაქრეს. თუ ფასი სწორად არ დაწესდა, კომპანიების ნაწილმა შესაძლოა მედიკამენტების საქართველოს ბაზარზე შემოტანის ინტერესი დაკარგონ, მაშინ ის პროდუქცია ბაზრიდან გავა. მოსახლეობას უდიდესი ზარალი მიადგება, თუკი თუნდაც რამდენიმე მედიკამენტზე დროებით შეიქმნება დეფიციტი“, — განმარტა ირაკლი მარგველაშვილმა.

რეფერენტული ფასი ითვალისწინებს მედიკამენტების ფასზე იმ ზედა ზღვრული მაჩვენებლის დაწესებას, რის ზემოთაც ბაზარზე მედიკამენტის რეალიზაცია დაშვებული არ იქნება. რეფერენტული ფასის მექანიზმი 36 ქვეყანაშია დანერგილი. ცვლილებები ასევე ეხება, საქართველოს ნაციონალური GMP (კარგი საწარმოო პრაქტიკის) სერტიფიკატის ფლობის გარეშე ფარმაცევტული პროდუქტის წარმოებასთან და საქართველოს ნაციონალური GDP (კარგი სადისტრიბუციო პრაქტიკის) სერტიფიკატის ფლობის გარეშე ფარმაცევტული პროდუქტის საბითუმო დისტრიბუციასთან დაკავშირებულ საკითხებს.