„რესპუბლიკური საავადმყოფოს“ პედიატრიული დეპარტამენტის მედპერსონალი ირაკლი  ღარიბაშვილს, ზურაბ აზარაშვილს და ლევან  იოსელიანს მიმართავს. მათი  თქმით  უმუშევრად რჩება პედიატრიული დეპარტამენტის მედპერსონალი და კოვიდ-თერაპიის მედპერსონალი.

 „თქვენდამი ჩვენი დაგვიანებული მომართვა განაპირობა ადმინისტრაციის და ჰოლდინგის ხელმძღვანელობის მიერ ჩვენი განცხადების რეაგირების გარეშე დატოვებამ.ჰოლდინგისა და კლინიკის ხელმძღვანელობის ურთიერთმიმართვის წერილებიდან ირკვევა,რომ გათავისუფლების მიზეზი არარენტაბელურობა(???) და კლინიკის განვითარებისადმი ხელის შეშლაა(???), თუმცა ადმინისტრაციის შესაბამისი ბრძანების გამოცემიდან მეორე დღეს,მინისტრის სატელევიზიო ინტერვიუდან ვგებულობთ,რომ უნდა მოხდეს შენობის დემონტაჟი და ახალი კლინიკის აშენება.ეს პროცესი,როგორც ჩანს,კოვიდ-დეპარტამენტების გაუქმებით უნდა დაიწყოს.

პედიატრიული დეპარტამენტი რესპუბლიკურ საავადმყოფოში გაიხსნა 2021წ-ის ივლისის ბოლოს,როდესაც ქვეყანაში იყო კოვიდ-პედიატრიული საწოლების დეფიციტი.სახელმწიფო ინტერესიბის გათვალისწინებით, ჩვენი პერსონალი,სრული შტატით,კვალიფიციური რეანიმაციით,მოვიდა სამუშაოდ აღნიშნულ კლინიკაში. დღემდე გატარებული გვყავს 2355 პედიატრიული და რეანიმაციული პაციენტი. აღსანიშნავია,რომ პერსონალის ნაწილმა დატოვა სხვა სამსახური კოვიდ-პანდემიის დასრულების დროისთვის „სუფთა“ პედიატრიულ დეპარტამენტში მუშაობის გაგრძელების დაპირებით,რის შესახებაც იყო საუბარი ცვლადი ადმინისტრაციის ყველა წარმომადგენლის მხრიდან.ასევე,ითქვა,რომ პედიატრიული მიმართულების გახსნა წარმოადგენდა სახელმწიფო ინტერესსაც.ახალი დეპარტამენტის გასახსნელად 2022წლის ნოემბრიდან გარემონტდა მე-6 სართული,მოეწყო შესაბამისი ინვენტარით,ძვირადღირებული აღჭურვილობით,გაკეთდა ბავშვთა კუთხე,ამუშავდა ბავშვთა ამბულატორიული მიღება,დაანონსდა მომავალში პედიატრიული მიმართულების გახსნა და შესაბამისი ღონისძიებით აღინიშნა 2022წლის 1 ივნისს,მაგრამ რემონტის დამთავრებიდან რამდენიმე დღეში,ისე,რომ განყოფილება არც გახსნილა,გამოსცეს ბრძანება პედიატრიული სამსახურის გაუქმებისა და ჩვენი განთავისუფლების თაობაზე ა.წ. 25/03-დან.მედპერსონალი აღმოვჩნდით ქუჩაში მინიმალური კომპენსაციით (ერთი თვის ხელფასი და შვებულების თანხა ექვს სამუშაო დღეზე გადათვლით???).

გთხოვთ,შეისწავლოთ აღნიშნული საკითხი.გაითვალისწინეთ,რომ სამოცდაათიან წლებში ეს კლინიკა აშენდა როგორც სტრატეგიული დანიშნულების ობიექტი, ჰოსპიტალი,თავისი მიწისქვეშა სართულებითა და გვირაბებით,სადაც შეიძლება საავადმყოფოსა და მოქალაქეების ევაკუაცია,რაც განსაკუთრებით აქტუალურია დღევანდელ მსოფლიოში არსებული დაძაბული ვითარებიდან გამომდინარე. კლინიკაში აღიზარდა ექიმების არაერთი თაობა,იყო ლიდერი და არაერთი სიახლის ინიციატორი,იყო და არის სამედიცინო უნივერსიტეტის ბაზა.

კლინიკის რეაბილიტაციის შესაძლებლობას იძლევა ის ფაქტი,რომ არ ფუნქციონირებს კორპუსის ნახევარი ფლიგელი,რომელიც სრულად იზოლირებულია მოქმედი ნახევრისგან და რემონტის დაწყება არ შეუშლის ხელს სამედიცინო საქმიანობას კორპუსის ამჟამად მოქმედ ნაწილში.ამასთანავე,არსებობს გამზადებული და პრეზენტირებული კლინიკის რეაბილიტაციის პროექტი,სადაც მოიაზრება პედიატრიული მიმართულების გახსნა სრული სერვისით 150 საწოლზე.

გამომდინარე ზემოაღნიშნულიდან,ვითხოვთ პედიატრიული დეპარტამენტისთვის გარემონტებულ ფართში გაიხსნას აღნიშნული დეპარტამენტი, როგორც ეს იყო გათვალისწინებული რემონტის დაწყებისას,რათა არ გაიზარდოს უმუშევართა და სოციალურად უკმაყოფილოთა არმია.

თუ კატეგორიულად გადაწყვეტილია ჩვენი სამსახურიდან განთავისუფლება, გთხოვთ,დაგვეხმაროთ დასაქმებაში,ღირსეული კომპენსაციის მიღებაში(მინიმუმ 2 თვის სახელფასო და გამოუყენებელი შვებულება სრულად). გაითვალისწინეთ,რომ თანამშრომელთა ნაწილს არ აქვს ალტერნატიული სამსახური და რჩება უმუშევარი, ყველა გათავისუფლებული ადამიანის უკან დგანან მათი ოჯახები, არასრულწლოვანი თუ სტუდენტი შვილები,ხშირ შემთხვევაში უმუშევარი ოჯახის წევრები,ასევე,ვალდებულებები სიფინანსო დაწესებულებების მიმართ.

იმედი გვაქვს თქვენი თანადგომის,საკითხის სწრაფად და სამართლიანად გადაწყვეტის.

პატივისცემით,პედიატრიული დეპარტამენტის სრული შემადგენლობა“ - წერია განცხადებაში.