ლარი გაუფასურების ახალ რეკორდს უახლოვდება, bloomberg-ის სავაჭრო სისტემაში დღის პირველ ნახევარში ლარის კურსი დოლართან მიმართებაში 3.45-იან ნიშნულს გასცდა. ლარის გაუფასურებას რუსეთ-უკრაინის ომის ფონზე ნეგატიურ მოლოდინებსა და ქვეყანაში არსებულ დაძაბულ პოლიტიკურ მდგომარეობას უკავშირებენ მთავრობის ეკონომიკურ გუნდში.

„ლარის კურსის დღევანდელი გაუფასურება გამოწვეულია, ძირითადად, ემოციური ფაქტორებით. ჩვენ ვთანხმდებით ეკონომიკურ გუნდში, მათ შორის ჩვენს ძირითად პარტნიორებთან, რომ მაკროეკონომიკური პარამეტრები, ჯერჯერობით, არის აბსოლუტურად ჯანსაღი და რეალურად, ეროვნული ვალუტის გაუფასურების ობიექტური საფუძვლები არ არსებობს“, – აცხადებს ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი.

ეკონომისტი ნიკა შენგელია კი ამბობს, რომ ეროვნულ ბანკს ლარის ასეთი ნახტომისებური გაუფასურება არ უნდა დაეშვა და რეზერვების გამოყენება უნდა დაეწყო.

„ლარის რეკორდულ გაუფასურებას ჩვენ ვაბრალებთ სპეკულაციურ ქმედებას კომერციული ბანკების მხრიდან. ეროვნულ ბანკს არ უნდა დაეშვა ასეთი ნახტომისებური გაუფასურება, რამაც გამოიწვია ფსიქოლოგიური მომენტი და მოსახლეობას ჭირდება თუ არა დოლარი, მაინც ყიდულობს. უახლოეს დღეებში ფასები ზრდა იქნება თითქმის ყველა მიმართულებით, ძირითადად პირადი მოხმარების საგნებზე. თუ ლარის კურსი მიაღწევს 3.70-იან ნიშნულს, ეს კატასტროფა იქნება, ფასები მომსახურებასა და პროდუქტებზე ასტრონომიულ ციფრებზე გავა“, - ამბობს შენგელია.

საქართველოს ეროვნულ ბანკს 2022 წელს ჯერ სავალუტო ინტერვენცია არ განუხორციელებია. 2021-ში კი სებ-მა 9 ინტერვენციით 332.9 მილიონი დოლარი გაყიდა. ეროვნული ბანკის მონაცემებით, 2022 წლის იანვრის მდგომარეობით საქართველოს სავალუტო რეზერვების მოცულობა 4,078,074,900 დოლარს შეადგენს.