საპენსიო სააგენტომ დოლარის შესყიდვა დაიწყო და 31 მარტის მდგომარეობით საინვესტიციო პორტფელის 4.2% დოლარშია ინვესტირებული.
საპენსიო სააგენტოს ყოფილი ხელმძღვანელი, ფინანსისტი ლევან სურგულაძე „კომერსანტთან“ ამბობს, რომ თუ ლარის გაუფასურების მოლოდინი არსებობს, მაშინ დოლარის შესყიდვის დაწყება დროული ქმედებაა, თუმცა ეს რამოდენიმე წლის წინ უნდა დაეწყოთ.
„რამდენად დროულია საპენსიო სააგენტოს მიერ დოლარის შეძენა? - თუ ლარის სისუსტეს ველოდებით მაშინ დროულია. თუმცა, ზოგადად დაგვიანებული ქმედებაა, მაგრამ ჯობია გვიან, ვიდრე არასდროს. ეს რამოდენიმე წლის წინ რომ დაეწყოთ, ახლა საანგარიშგებო ვალუტაში (ლარში) რამოდენიმე ათეული მილიონი ლარით მეტი იქნებოდა.
4% ფონდისა უყიდიათ დოლარი და დევს ბანკში. 20%-მდე შეუძლიათ, მაგრამ ამხელა თანხის დოლარის შესყიდვა (თითქმის ნახევარი მილიარდი ლარი) ერთბაშად ვერ მოხდება და ნელ-ნელა უნდა გააკეთონ, რომ ლარს არ დაარტყას. ბანკში დოლარს პრაქტიკულად არაფერი ერიცხება, ალბათ წლიური 2% მაქსიმუმ. ლარი სავარაუდოდო ვერ დარჩება იმ ნიშნულზე, სადაც არის. სავარაუდოდ არ გამყარდება ამაზე მეტად, უფრო დიდი ალბათობით გაუფასურდება“, - ამბობს ლევან სურგულაძე.
მისი თქმით, განსაკუთრებით მნიშვნელოვანია, რომ საპენსიო სააგენტოს საინვესტიციო სამსახურმა დაიწყოს საინვესტიციო საქმიანობა, საინვესტიციო პორტფელის დივერსიფიცირება და საპენსიო ფონდის სახსრების სხვადასხვა ფინანსურ ინსტრუმენტებში, მათ შორის ადგილობრივი კომპანიების ობლიგაციებში განთავსება და რეალური ეკონომიკის ბანკების მიღმა პირდაპირი დაფინანსება.
საპენსიო სააგენტოს 2022 წლის მარტის ანგარიშის მიხედვით, საპენსიო ფონდის აქტივების წმინდა ღირებულება 2.23 მილიარდ ლარს შეადგენს. ფონდის წმინდა ამონაგები 2019 წლიდან 2022 წლის მარტის ჩათვლით 34.6%-ია, ხოლო რეალურმა ამონაგებმა (ინფლაციის გათვალისწინებით) იმავე პერიოდში სულ 3.15% შეადგინა.
2022 წლის 6 აპრილის მდგომარეობით, საპენსიო სქემაში რეგისტრირებულია 1 მილიონ 265 ათას მონაწილე. საინვესტიციო საქმიანობის შედეგად დარიცხულმა სარგებელმა კი 318 მილიონი ლარი შეადგინა. დაგროვებითი პენსიით დღეისათვის 1,698-მა ადამიანმა ისარგებლა.
ნინო თამაზაშვილი