თუ მომხმარებელს აქვს უნარი, რომ დატვირთვა ჰქონდეს დაბალფასიან სეგმენტში, ეს მას ელექტროენერგიის ხარჯებს შეუმცირებს,- ამის შესახებ ენერგეტიკული ბირჟის ხელმძღვანელმა ირინა მილორავამ რადიო „პალიტრისა“ და „პალიტრანიუსის“ გადაცემაში „საქმე“ დღის და ღამის ტარიფებზე საუბრისას განაცხადა.
მისი თქმით, მართალია, სატესტო რეჟიმის ფასები არ შეიძლება იყოს ინდიკატორი, თუმცა - „ცალსახად, 1,5-2-ჯერაც კი არის განსხვავება ღამისა და დღის ფასებს შორის“.
ცნობისთვის, საქართველოში ელექტროენერგიაზე დღის და ღამის ტარიფები ამოქმედდება. 2022 წლის 1-ლი იანვრიდან საწარმოებს უკვე შესაძლებლობა ექნებათ დენზე დიფერენცირებული ფასით ისარგებლონ. იმისთვის, რომ ბიზნესმა სრულად ისარგებლოს ამ შესაძლებლობით, ენერგეტიკული ბირჟის სრულად ამოქმედებაა საჭირო, რომელიც ამ დროისთვის სატესტო რეჟიმშია.
„როცა ხარ მომხმარებელი, ამ ახალი მოდელისგან ელოდები რაღაც განსხვავებულს. იმიტომ, რომ დღესაც მიეწოდებათ მათ ელექტროენერგია და დღესაც მიეწოდებათ „სემეკის“ მიერ რეგულირებულ ფასად. რა უნდა იყოს განსხვავება და ე.წ ბენეფიტი, სარგებელი, ახალი მოდელიდან - პირველი, ეს არის დიფერენცირებული ტარიფი. ეს ნიშნავს იმას, რომ თუ დღეს მომხმარებელი იხდის მაგალითად, ერთიან ტარიფს მთელი თვის განმავლობაში, მომავალში იგი დროში დიფერენცირებულ ტარიფით ისარგებლებს, რაც ნიშნავს იმას, რომ ღამის, დღის და პიკური პერიოდის ფასი განსხვავებული იქნება. რატომაა ეს შესაძლებლობა მომხმარებლისთვის? თუ მომხმარებელს აქვს უნარი და მას ტექნიკურად შეუძლია, თავისი მოხმარება ისე გადაანაწილოს, რომ დატვირთვა ჰქონდეს დაბალფასიან სეგმენტში, ეს ბუნებრივია, მას ელექტროენერგიის ხარჯებს შეუმცირებს.
მართალია, სატესტო რეჟიმის ფასები არ შეიძლება იყოს ინდიკატორი, მაგრამ ცალსახად, 1,5-2-ჯერაც კი არის განსხვავება ღამისა და დღის ფასებს შორის. განსაკუთრებით ეს თვალხილული იყო სხვა სპეციფიკის გათვალისწინებით. თუმცა, რომ შევხედოთ იგივე სხვა ქვეყნების გამოცდილებას, გვაჩვენებს, რომ ხანდახან ღამის საათებში ფასი არის უარყოფით. ამას აქვს თავის კონკრეტული ახსნა და ჩვენ არ შეგვიძლია ამაზე აქცენტი გავაკეთოთ. იმისთვის, რომ დავინახოთ რა განსხვავებაა დღის და ღამის ფასებს შორის, ის მაგალითიც კმარა, რომ ამ ზაფხულს ევროპულ ქვეყნებში იყო მინუსიანი ფასი. ეს ნიშნავს იმას, რომ მე ვყიდულობ ელექტროენერგიას და აქეთ მიხდიან ელექტროენერგიის ღირებულებას. მართალია ამას სხვა საფუძველი ჰქონდა, მაგრამ ეს განსხვავება არის თვალხილული“,- განაცხადა ირინა მილორავამ.
bpn.ge