თუ ქვეყანაში არ ჩატარდა რადიკალური ეკონომიკური, საგადასახადო და მონეტარული რეფორმა, მივალთ ეკონომიკურ კრიზისამდე, ამის შესახებ სოციალურ ქსელში ეკონომისტი ოთო აბესაძე წერს.
ეკონომისტის განმარტებით, საქართველოში უნდა შემცირდეს გადასახადები, რის ხარჯზეც მეტი ფული დარჩება მოსახლეობაში და შეივსებენ ინფლაციურ დანაკარგს.
„გასული წლის ანალოგიურ პერიოდთან შედარებით ინფლაციურ ნიადაგზე გაძვირდა:
სურსათი 16.3%-ით
ალკოჰოლი და თამბაქო 9.3%-ით
კომუნალური სერვისები 15.8%-ით
ავეჯი, სახლის მოვლა 8.8%-ით
ტრანსპორტი 5.5%-ით
განათლება 6.6%-ით
სასტუმრო, რესტორანი 14.8%-ით
სხვადასხვა საქ/მომსახურება 11.6%-ით
საშუალოდ გასული წლის ანალოგიურ პერიოდთან შედარებით 11% - ით გაგვიძვირდა ყოველდღიური ცხოვრება.
ასევე თუ გავითვალისწინებთ ლარის მსყიდველუნარიანობის ინდექსს და დაქირავებით დასაქმებულთა საშუალო თვიურ შემოსავალს, საშუალო ჰარმონიული შეწონილის მეთოდოლოგიით და კორელაციურ-რეგრესიული ანალიზის საფუძველზე დაყრდნობით გასული წლის ანალოგიურ პერიოდთან შედარებით 23.5% - ით გავღარიბდით.
საშუალოდ ზუსტად იგივე საქონელსა და მომსახურებაში რასაც ვიყენებდით გასული წლის იანვარში, წელს ზუსტად იგივე საქონლისა და მომსახურების შესაძენად 23.5% - ით მეტი შემოსავალი გვჭირდება.
საქართველოში დაქირავებით დასაქმებულთა საშუალო ხელფასი არ გაზრდილა (გარდა საჯარო სამსახურისა და იქაც 10% - ით)
საქართველოში უნდა შემცირდეს გადასახადები რის ხარჯზეც მეტი ფული დარჩება მოსახლეობაში და შეივსებენ ინფლაციურ დანაკარგს.
საქართველოში გადასახადი არის არა ფიქსირებული, არამედ მზარდი. მაგალითად:
როდესაც პური ღირდა 1 ლარი, მაშინ ვიხდიდით დღგ-ს 18% - ს ანუ 1 პურში 18 თეთრს და დღეს როდესაც პური ღირს 2 ლარი, ვიხდით ისევ 18% - ს, ოღონდ უკვე 36 თეთრს 1 პურში
თუ ქვეყანაში არ ჩატარდა რადიკალური ეკონომიკური, საგადასახადო და მონეტარული რეფორმა, მივალთ ეკონომიკურ კრიზისამდე“, - წერს სოციალურ ქსელში ოთო აბესაძე.