„ჩვენ ვიმუშავებთ სადაზღვევო კომპანიებთან და ლოგიკური იქნება, რომ DRG მეთოდზე გადასვლის პროცესში სადაზღვევო სექტორიც ჩაერთოს“, - ამის შესახებ ჯანდაცვის მინისტრის მოადგილემ ილია ღუდუშაურმა ტელეკომპანია „იმედის“ ეთერში განაცხადა.

მისი თქმით, ჰოსპიტალურ სექტორთან იყო შეხვედრა, რომელსაც ესწრებოდნენ სხვადასხვა სადაზღვევო კომპანიის წარმომადგენლებიც და ეს საკითხი დადგა იქიდან გამომდინარე, რომ საყოველთაო ჯანდაცვა მთელი სექტორის ერთერთი მთავარი მოთამაშეა და სტაციონარული დანახარჯების თითქმის 80-ს საყოველთაო იხდის.

სადაზღვევო კომპანია „გლობალ ბენეფიტს ჯორჯიას“ გენერალური დირექტორი და „ჯეო ჰოსპიტალს“-ის სამეთვალყურეო საბჭოს თავმჯდომარე ნინა კობახიძე „კომერსანტთან“ ამბობს, რომ სადაზღვევო სექტორი თუ დაინახავს რომ აქამდე არსებულ სისტემაზე უფრო ოპტიმალური იქნება „დიარჯი“ მეთოდზე გადასვლა, გადაწყვეტილებას მხოლოდ ამის შემდეგ მიიღებს.

„სახელმწიფოს შემდეგ სამედიცინო სერვისების ყველაზე დიდი შემსყიდველი არის სადაზღვევო სექტორი. მოგეხსენებათ ჩვენ ჩვენი სისტემა გვაქვს კლინიკებთან ურთიერთობებში აწყობილი და DRG-ის რაღაც მექანიზმებზე უკვე ვიყენებთ. თუმცა თუ ჩვენ დავინახავთ, რომ ეს მოდელი შესაძლოა უფრო ეფექტური იყოს, ვიდრე აქამდე არსებული სისტემა და რაღაც კომპონენტებზე ჩვენზე უფრო ოპტიმალურად არის გაკეთებული, რა თქმა უნდა გამოვიყენებთ, მაგრამ ამ ეტაპზე არ ვიცით, ჯერ უნდა დავიწყოთ და შემდეგ შევხედავთ. 

აქამდე ინდივიდუალური კონტრაქტირება გვქონდა საქართველოს ყველა კლინიკასთან. თუ ახალი მიდგომა მხოლოდ საყოველთაო ჯანდაცვის პროგრამაზე დარჩება და არ გავრცელდება კერძო სადაზღვევო კომპანიების მიერ სამედიცინო სერვისების შესყიდვებზე, არც ეს იქნება პრობლემა, რადგან სადაზღვეოები და სახელმწიფო არის კლინიკების სერვისების შემსყიდველი, სახელმწიფო ჩვენს სისტემას რაღაცნაირად მიუახლოვდება, რომლითაც ჩვენ აქამდე ვყიდულობდით, ჩვენ წინ ვიყავით საყოველთაო ჯანდაცვის სისტემასთან მიმართებაში და ერთმანეთთან კავშირში არ არის. თუ სადაზღვევო სექტორს მოგვეწონება, თუ მისაღები იქნება და თუ უკეთესი იქნება იმ სისტემაზე, რომელიც ჩვენ გვაქვს რაღაც კომპონენტებს გამოვიყენებთ. ზოგადად ძალიან საინტერესო და მივესალმებით, ვფიქრობ ამით კონკურენციაც გაჯანსაღდება“, — ამბობს კობახიძე.

1-ელი ნოემბრიდან, სამედიცინო დაწესებულებებში, მომსახურების დიაგნოზთან შეჭიდული ჯგუფებით (DRG) დაფინანსების ახალი მოდელი ამოქმედდება. DRG მოდელი საყოველთაო ჯანდაცვის პროგრამის ფარგლებში დაფინანსების მოცულობას პაციენტის დიაგნოზისა და სხვა რამდენიმე ფაქტორზე დაფუძნებით განსაზღვრავს. ასეთი შეიძლება იყოს ასაკი, სქესი, გეოგრაფიული ლოკაცია და სხვა.