„გამომდინარე იქიდან, რომ ვიცნობ ქართულ ბაზარს, ეჭვი მეპარება მოგების იმ მარჟის სისწორეში, რაც პრემიერმა დაასახელა, ეს უფრო სახელმწიფოს მხრებიდან ტვირთის ჩამოხსნის და ამ ტვირთის კერძო სექტორის მხრებზე გადატანის მცდელობას ჰგავს,“ - ასე გამოეხმაურა საერთაშორისო სავაჭრო პალატის ხელმძღვანელი ფადი ასლი პრემიერ ღარიბაშვილის განცხადებას, სადაც ის იმპორტიორებს მოგების მაღალი მარჟის გამო აკრიტიკებდა.

ფადი ასლის თქმით, პრემიერის  აღნიშნული განცხადება ძალიან პოპულისტური იყო

„მე ეჭვი მეპარება იმ მარჟაში, რაც  პრემიერ-მინისტრმა დაასახელა, მისი განცხადება იყო  პოპულისტური და ხელისუფლების მხრებიდან პასუხისმგებლობის ჩამოხსნას და ამ პასუხისმგებლობის ბიზნეს სექტორის მხრებზე გადატანას ემსახურებოდა.

საბაზრო ეკონომიკის პირობებში ფასების კონტროლი ხელისუფლებას არ შეუძლია, მან უნდა წაახალისოს კონკურენცია და წაახალისოს ის ადამიანები, რომლებსაც ბაზარზე შესვლა სურთ.

თუ ხელისუფლება გააკონტროლებს ფასებს, მაშინ ეს აღარ იქნება საბაზრო ეკონომიკა, ეს იქნება მართული ეკონომიკა, ისეთი როგორიც  იყო საბჭოთა კავშირში,“ - აღნიშნა ფადი ასლიმ.

ფადი ასლი „კომერსანტთან“ საუბრისას აცხადებს, რომ კონკურენციის პირობებში მოგების მარჟა იკლებს და საშუალოდ 3% - იდან 12% - მდე მერყეობს.

„მოგების მაღალი მარჟის შესახებ ანტიმონოპოლიური დეპარტამენტის მიერ ჩატარებული კვლევა მე არ მინახავს, შესაბამისად, ამ კვლევის გარეშე საკითხზე მსჯელობა გამიჭირდება, თუმცა როგორც ბიზნესმენმა, რომლის მთელი ცხოვრებაც ვაჭრობას ეხება, შემიძლია ვთქვა, რომ მოგების მარჟა ძალიან მცირეა და არმანის ტანისამოსის გაყიდვა 100 ან 200%-იანი მარჟით შეუძლებელია. კონკურენციის პირობებში საქონელზე მოგების მარჟა საშუალოდ 3%- იდან 12% - მდე და კონკურენციის გამო მოგების მარჟა იკლებს.

აქ  გვაქვს ორი პუნქტი, იმ შემთხვევაშიც კი  თუ ეს  სიმართლეა [პრემიერის  განცხადება] ეს ნიშნავს იმას, რომ ჩვენ თავისუფალი ბაზრის პირობებში არ ვართ და ქვეყანაში  კონკურენცია არ არის, იმპორტიორები კი მონოპოლისტები არიან, მაგრამ თუ შენ მთავრობა არ გმფარველობს, ვერ იქნები მონოპოლისტი. შესაბამისად მონოპოლისტები, რომლებსაც მთავრობა მფარველობს, ზრდიან ფასებს და მათ კონკურენცია არ უწევთ. მეორე  სცენარი არის ის, რომ პრემიერის  ეს  განცხადება სიმართლეს არ შეესაბამება,“ - აღნიშნა ფადი ასლიმ.

  თაკო კვაჭანტირაძე