კონსორციუმს ზღვის აკვატორია მივეცით, გამოვისყიდეთ მიწები, პასუხისმგებლობა გვქონდა რომ რკინიგზა და გზა შეგვეყვანა, საუბარი იყო იმაზე,რომ იქნებ ტვირთების გარანტიაც მოგცეთო. თუ ყველაფერს ჩვენ ვაკეთებთ ანაკლიის პორტთან დაკავშირებით, მაშინ კონსორციუმი, რად გვინდა, სახელმწიფო გააკეთებს სრულად და მოგებაც გვექნება,- განაცხადა რადიო „კომერსანტის“ გადაცემაში „ეკონომისტის დრო ლევან ქისტაურთან ერთად“, პარლამენტის საფინანსო-საბიუჯეტო კომიტეტის თავმჯდომარის პირველმა მოადგილემ, პაატა კვიჟინაძემ. მან გადაცემაში ანაკლიის პორტის მშენებლობის საკითხზე ისაუბრა.

კვიჟინაძის თქმით, პორტი ეფექტური იქნება იმ შემთხვევაში, თუ მასში კაპიტალს ამერიკა, ევროკავშირი და ჩინეთი ჩადებენ.

ანაკლიის პორტის აშენების იდეა ახალი არ არის, ჯერ კიდევ, კომუნისტების დროს იდგა ეს საკითხი დღის წესრიგში. თუმცა, იმ დროისთვის არსებულ მოთხოვნებს ბათუმისა და ფოთის პორტები სრულად აკმაყოფილებდა,დღესაც, ბათუმისა და ფოთის მცირედი მოდერნიზაციის შემთხვევაში 3-4 ჯერ გაიზრდება ტვირთბრუნვა.- ამბობს პაატა კვიჟინაძე. როგორც მან გადაცემაში აღნიშნა, ქვეყანამ განსაკუთრებული ყურადღება უნდა დაუთმოს ჩინეთიდან ტვირთის საქართველოს გავლით ევროკავშირში შეტანის ინიციატივებს.

ქვეყანა დაიქცევა, თუ ეს პორტი არ გაკეთდება- ასე საკითხი არ დგას. ჩინეთი ევროპასთან ვაჭრობს 600 მილიარდ დოლარს, ძალიან კარგი იქნება ამ ტვირთის 5-10 % რომ წამოვიდეს, მეტს ვერც შევძლებთ დღევანდელი რესურსებით. ამიტომ ჩვენ უნდა ვიბრძლოთ ამისთვის. თუ კი ევროპა და ჩინეთი არ დაინტერესდება,რომ ჩვენ მხარეს გადმოზიდოს ტვირთი, გაგვიჭირდება ტვირთების მოზიდვა. ანაკლიის პორტი ძალიან კარგია და მივესალმები, თუმცა ვფიქრობ,რომ ის იდეალურად იმუშავებს იმ შემთხვევაში, თუ მასში ჩადებული კაპიტალი იქნება ამერიკის, ევროკავშირის, ჩინეთის, იმ ქვეყნების, ვინც იმოძრავებს,- აღნიშნავს კვიჟინაძე.

მოამზადა ნათია კეკენაძემ