საქართველოს გავლით ტვირთების გადაზიდვების მოცულობა გაზრდილია, - აღნიშნულის შესახებ „ბიზნესი რუსთავი 2“-ზე საქართველოს ლოგისტიკის ასოციაციის თავმჯდომარემ გიორგი დობორჯგინიძემ ისაუბრა. მისი თქმით, ზრდა განსაკუთრებით 2022 წლის მესამე კვარტალში დაფიქსირდა.
„ბოლო პერიოდში, განსაკუთრებით კი მიმდინარე წლის მესამე კვარტალში შეიმჩნევა მკვეთრი ზრდა სატრანსპორტო გადაზიდვებში საქართველოს და ტრანსკავკასიური სატრანსპორტო დერეფნის გავლით. ამაზე კი დიდი გავლენა მოახდინა როგორც პანდემიამ, ასევე რუსეთ-უკრაინის ომმა. პანდემიიდან გამოწვეული შედეგი იყო ის, რომ პრაქტიკულად მიწოდებას და მოთხოვნას შორის გლობალურად შეიქმნა დისბალანსი. პანდემიის დასრულების შემდეგ ჩვენ შევეჯახეთ ისეთ რეალობას რომელმაც განაპირობა ის, რომ მოთხოვნა გაიზარდა, განსაკუთრებით სამომხმარებლო პროდუქტებზე და მიწოდებაში შეიქმნა გარკვეული პრობლემები. კერძოდ, გლობალურად, მწარმოებლებს და განსაკუთრებით ჩინურ მწარმოებლებს, შეექმნათ ნედლეულის მიწოდების პრობლემა. შესაბამისად ამან მიწოდებაში დეფიციტი შექმნა. კარგად ვიცით, რომ პანდემიის დასრულების შემდეგ ჩინეთში ეს პროცესი კიდევ გაგრძელდა, რომელიც დაკავშირებული იყო „ზერო კოვიდ“ პოლიტიკასთან, რამაც კიდევ უფრო უარყოფითი გავლენა იქონია მიწოდების ჯაჭვზე იმ კუთხით, რომ როდესაც ეს ტვირთი დაიძრა ჩინეთის პორტებში რეალურად შეიქმნა სიმძლავრეების პრობლემები. ამან კი უფრო აქტუალური გახადა ჩვენი დერეფანი, ანუ შუა დერეფანი, რომელიც მოიცავს ცენტრალურ აზიასა და კავკასიას. ანუ ამ დერეფნის საჭიროება უფრო აქტუალური გახდა“,- განაცხადა დობორჯგინიძემ.
მისი თქმით, საქართველოზე ამ დროისათვის ტვირთების 2 ნაკადია.
„ჩვენ პრაქტიკულად 2 ძირითადი ნაკადი გაქვს. ეს არის რაზეც ძირითადი გავლენა რუსეთ-უკრაინის ომმა იქონია, საუბარია ცენტრალური აზიის ექსპორტზე კავკასიის გავლით, ასევე იმპორტზე. ეს არის ტრანზიტული ტვირთები. ეს არის ის ტვირთები, რომელიც ადრე რუსეთის და ბალტიისპირეთის დერეფნით გადიოდა და ამ ტვირთების ნაწილი ახლა გადმოვიდა ჩვენს დერეფანში. მეორეს მხრივ, ეს არის ის ტვირთები რომლებიც ჩინეთიდან მოდიოდა და რუსეთის გავლით გადიოდა ევროპაში“, - აცხადებს გიორგი დობორჯგინიძე.
საქართველოს ლოგისტიკის ასოციაციის თავმჯდომარე ამბობს, რომ საქართველოს დერეფანზე ტვირთების გადმომისამართების დიდი ნაწილი უჭირავს ტვირთებს ცენტრალური აზიიდან.
„საუბარია როგორც ექსპორტზე ისე იმპორტზე. ეს კი ნიშნავს ნედლეულის გადაზიდვებს საქართველოს პორტების გავლით, რაც მნიშვნელოვნად გაზრდილია. და ეს არის ძირითადად რუსეთ-უკრაინის ომის გავლენა. პრობლემა არის იმაში, რომ მიუხედავად იმისა რომ ტვირთი დასანქცირებული არ არის გადამზიდავები მიიჩნევენ, რომ მათი ტრანსპორტირება რუსეთის და ბალტიისპირეთის კორიდორით მაინც საშიშია. ვინაიდან რიგი საერთაშორისო გადამზიდავები უარს ამბობენ რუსეთის სატრანზიტო ტვირთებზე. ამიტომ ჩვენი კორიდორი უფრო უპირატესი ხდება“-, ამბობს დობორჯგინიძე.
საქართველოს ლოგისტიკის ასოციაციის თავმჯდომარე გრძელვადიან პერსპექტივაში საქართველოს დერეფნის კონკურენტუნარიანობის ზრდის აუცილებლობაზე საუბრობს, როგორც ტარიფების ასევე ვადების მხრივ. გიორგი დობორჯგინიძეს მიაჩნია, რომ ის ტვირთები, რაც საქართველოზე მოკლევადიან პერსპექტივაში გადმომისამართდა, მისი გრძელვადიან პერსპექტივაში შენარჩუნება უნდა მოხერხდეს, რისთვისაც კონკურენტუნარიანობის ზრდა აუცილებელია.
„ეს არის ყველაზე უმოკლესი მარშრუტი, მანძილიდან გამომდინარე, რაც ძალიან მიმზიდველია. თუმცა კონკურენტუნარიანობიდან გამომდინარე ვერ ვიტყვით, რომ ის სრულად კონკურენტულია რადგან ჯერ კიდევ თუ ვისაუბრებთ სატარიფო პოლიტიკაზე ჩრდილო კორიდორი უფრო მომგებიანია. ეს არის უფრო მოკლევადიანი ეფექტი, რადგან გადამზიდავები უპირატესობას ანიჭებენ სანდოობას და არა ფასს. თუმცა იმისათვის, რომ გრძელვადიან პერსპექტივაში შევძლოთ ამ ტვირთების მომსახურება უნდა ვიფიქროთ კონკურენტული გარემოს ზრდაზე, როგორც სატარიფო ასევე გადაზიდვის სისწრაფეზე“, - აცხადებს საქართველოს ლოგისტიკის ასოციაციის თავმჯდომარე.