ხუთვარსკვლავიანი სასტუმროები კვლავ ფუნქციონირებენ რუსეთში, მაგრამ სანქციების ფონზე ისინი ადგილობრივ მოგზაურებს უნდა დაეყრდნონ.
Ritz-Carlton-ი და Four Seasons-ი მოსკოვში გვთავაზობენ დასვენებას, რომელიც შეიძლება ღირდეს დაახლოებით 284,375 რუბლი ($2,165) ღამეში.
Belmond-მა ასევე გახსნა Grand Hotel Europe სანქტ-პეტერბურგში. ქსელმა, რომელიც LVMH-ს ეკუთვნის, მიმდინარე თვის დასაწყისში რუსეთში 124 მაღაზიის დახურვა გადაწყვიტა. ფუფუნების საქონლის ფრანგულმა მწარმოებელმა, რომელიც ფლობს Louis Vuitton-ს, Christian Dior-ს და Sephora-ს და ჰყავს 3500 თანამშრომელი რუსეთში, Belmond-ი 2019 წელს იყიდა.
Belmond-ის მაგალითი გვიჩვენებს, რომ ზოგიერთი უცხოური კომპანია, როგორიცაა LVMH, არ აპირებს რუსეთის სრულ დატოვებას, მიუხედავად მაღაზიების დახურვის შესახებ განცხადებისა. ლოჯისტიკურმა საკითხებმა შეიძლება ძალიან გაართულოს Louis Vuitton-ის ჩანთების მიწოდება რუსეთში, მაგრამ ახლა მაინც შესაძლებელია სასტუმროს ფუნქციონირება და ყველა ტიპური სერვისის მიწოდება.
Belmond-ის სპიკერმა განაცხადა, რომ ქსელი აგრძელებს განვითარებული მოვლენების მონიტორინგს. სანქტ-პეტერბურგის სასტუმროში 280 ადამიანია დასაქმებული.
Marriott-მა, Ritz-Carlton-ის მფლობელმა, 10 მარტის განცხადებაში აღნიშნა, რომ მისი სასტუმროები რუსეთში მესამე მხარის საკუთრებაა და ის აგრძელებს ქსელის ფუნქციონირების შესაძლებლობის შეფასებას. ჯგუფმა დახურა კორპორატიული ოფისი მოსკოვში და აჩერებს ინვესტიციებს ქვეყანაში. სასტუმროების ჯგუფები, როგორც წესი, ფრენჩაიზს ან ოპერირებას უწევენ ბრენდებს მათი ფლობის გარეშე.
InterContinental-მა 10 მარტს განაცხადა, რომ აჩერებს ახალი სასტუმროების გახსნას რუსეთში და დასძინა, რომ აქვს “გრძელვადიანი მენეჯმენტის ან ფრენჩაიზის ხელშეკრულებები დამოუკიდებელ მესამე კომპანიებთან, რომლებიც ფლობენ სასტუმროებს რუსეთში”.
რუსეთის წინააღმდეგ სანქციები, სავარაუდოდ, შეაშინებს უცხოელ ტურისტებს და უარყოფითად იმოქმედებს სასტუმროებზე, განაცხადა მალტაში რეგისტრირებულმა International Hotel Investments-მა 3 მარტს. კომპანია ფლობს ქსელ Corinthia-ს, რომელსაც აქვს ძვირადღირებული სასტუმრო სანქტ-პეტერბურგში ერმიტაჟის მახლობლად.
გლობალურმა ტურისტულმა ინდუსტრიამ უკვე გადადგა ნაბიჯები რეგიონში წარმომადგენლობის შესამცირებლად. Booking.com-მა შეაჩერა ტურისტული მომსახურება რუსეთსა და ბელარუსში. შიდა მოგზაურობები ასევე კლებულობს. 24 თებერვლიდან 2 მარტის ჩათვლით კვირაში რუსეთში ფრენების დაჯავშნის რაოდენობა წინა 7 დღესთან შედარებით 49%-ით შემცირდა.
წყარო: Bloomberg businessformula.ge
ძვირადღირებული სასტუმროები რუსეთში
