ტურისტულ კომპანიებს  მიმდინარე წლის მარტიდან განსაკუთრებით გაუჭირდათ. უკრაინაში მიმდინარე ომის გამო ტურისტულ სერვისებზე მოთხოვნა თითქმის არ ყოფილა.  ძირითადად შემოდიან რუსეთის და ბელარუსის მოქალაქეები, რომლებიც რეალურად არ არიან ტურისტები.

როგორც „ტრეფიკ თრეველის“   ხელმძღვანელი ცოტნე ჯაფარიძე აცხადებს, უკრაინაში მიმდინარე ომის პირობებში საქართველო მაღალი რისკის ქვეყნად მიიჩნევა და მოგზაურობა-დასვენებისგან ბევრი უცხოელი ტურისტი იკავებს თავს, განსაკუთრებით ევროპელები.

,,24 თებერვლიდან მოყოლებული, რაც ომია უკრაინაში, ტურისტული ნაკადების მასპინძლობა თითქმის შეუძლებელი გახდა. იშვიათია კომპანია, ვინც ამას ახერხებს.

,,ტრეფიკ თრეველს“ დარგში მუშაობის მრავალწლიანი გამოცდილება გააჩნია და თამამად შემიძლია სექტორის  სახელით ვისაუბრო. ტურიზმი რეალურად მძიმე განსაცდელში აღმოჩნდა.  განსაკუთრებით ვინც ევროპის მიმართულებით მუშაობს, დროებით ტაიმაუტი ავიღეთ, ომია რეგიონში და ბუნებრივია, რომ  საქართველოში დასვენების სურვილი არ აქვთ. სიმართლე გითხრათ, არ ვიცი, რის საფუძველზე გაკეთდა დასკვნა, რომ ტურიზმი თითქმის 50%-ით აღდგა. მარტში ჩვენ, ტურისტულ კომპანიებს, ფაქტობრივად არ გვიმუშავია. შემოდიან ძირითადად რუსი და ბელარუსი მოქალაქეები, რომლებსაც ტურისტებად ვერ აღვიქვამთ, ასევე უკრაინელებიც, მაგრამ ისინი რეალურად ლტოლვილები არიან“, - ამბობს ცოტნე ჯაფარიძე ,,კომერსანტთან“.

მისი შეფასებით, პანდემიას ისე არ დაუზარალებია ტურისტული სექტორი საქართველოში, რა გავლენაც მასზე უკრაინაში მიმდინარე ომმა მოახდინა.

,,შარშან ამ დროს მნიშვნელოვანი ზრდა ფიქსირდებოდა, რადგან უკვე მარტიდან ქვეყანაში  შემოსვლაზე შეზღუდვა მოიხსნილი იყო  და ამან დამსვენებლები წაახალისა. ომის ეფექტი გაცილებით მძიმე აღმოჩნდა, ვიდრე კორონავირუსის. კომპანიებმა დროებით ტაიმაუტი ავიღეთ, ასე  ჯერჯერობით, სანამ ომი ჩაწყნარდება და რისკები შემცირდება“, - ამბობს ტურისტული კომპანიის ხელმძღვანელი.

სექტორში  წარმომადგენლები საუბრობენ იმაზეც, რომ ბაზრების დივერსიფიცირება უნდა მოხდეს და  აზერბაიჯანის,  ასევე აზიის  და არაბული ქვეყნებიდან ჩანაცვლდეს ის ნაკადები, რომელიც უკრაინიდან და რუსეთიდან შემოდიოდა.

ამ თვალსაზრისით, საინტერესოა ეკონომიკის მინისტრის ლევან დავითაშვილის განცხადება, რომელიც მან ბაქოში სტუმრობისას გააკეთა.

,,ვისაუბრეთ ისეთ ახალ მიმართულებებზე, როგორიც არის ციფრული ტრანსფორმაცია, ასევე ტურიზმის სექტორში თანამშრომლობა, მეტი ინვესტიციები ტურისტულ ინფრასტრუქტურაში, ერთობლივი ტურისტული პროექტების განხორციელება და რეგიონის წარმოჩენა საერთაშორისო მასშტაბით მსოფლიო რუკაზე“, - აღნიშნა ლევან დავითაშვილმა.

რაც შეეხება ტურიზმთან დაკავშირებით მონაცემებს, ტურიზმის ეროვნული ადმინისტრაციის ხელმძღვანელის მოვალეობის შემსრულებლის მედეა ჯანიაშვილის ინფორმაციით, 2022 წლის მარტში 2019 წლის ანალოგიურ პერიოდთან შედარებით ტურისტული ვიზიტების აღდგენის კოეფიციენტი 48.5%-ს შეადგენს.

მისივე ინფორმაციით, იანვარი-მარტის პერიოდში აღდგენის დინამიკა ტურისტების რაოდენობის კუთხით 52%-ს აღწევს,  რაც ძალიან იმედის მომცემია და წელს კარგი შედეგი გვექნება.

მარი ჩიტაია