ზაფხულის ტურისტულ სეზონს ჰორეკა ინდუსტრია გაზრდილი ფასებით ხვდება. როგორც დარგის სპეციალისტები აღნიშნავენ, ნელ-ნელა ძვირდება თითქმის ყველა სერვისი, თუმცა ჯავშნები მეტნაკლებად აქტიურია და მოთხოვნა კიდევ გაიზრდება. ტურიზმის სფეროს სპეციალისტი მანანა ალადაშვილი ,,კომერსანტთან“ აღნიშნავს, რომ ფასები ყველაზე მეტად კვების ობიექტებში გაიზარდა.
მიიღე ინფორმაცია უფრო სწრაფად „კომერსანტის“ Telegram-ზე.
,,სასტუმროებში დასვენების ტარიფები დიდად არ შეცვლილა, თუმცა რიგი მომსახურების შემთხვევაში ფასების სერიოზული ზრდაა. განსაკუთრებით ეს ეხება კვების ობიექტებს, სადაც ფასები 70%-მდე ასწიეს, 25-30%-ის ფარგლებში ტრანსპორტით მომსახურებაც გაძვირდა. საფასო ცვლილება ობიექტური გარემოებებით არის გამოწვეული და ფასების ზრდის ტენდენციას უკავშირდება, რაც გლობალური პროცესია. ტრანსპორტის მომსახურება 25-30%ის ფარგლებშია გაძვირებული, გადაადგილება საკმაოდ ძვირი ჯდება“, - ამბობს ალადაშვილი.
მისი თქმით, ტურიზმის მსოფლიო ინდუსტრიაში განსაკუთრებით დიდი გამოცოცხლება 2023 წელს არის ნავარაუდევი, მათ შორის, საქართველოშიც, არსებული პროგნოზით, ტურისტების რაოდენობა 16 მილიონს მიაღწევს.
,,ევროპული ნაკადები ბოლო პერიოდში მკვეთრად იყო შემცირებული, მაგრამ ჯავშნები ამ მიმართულებით თანდათან მატულობს. სულ ცოტა ხნის წინ ჩვენ ჩავატარეთ კვლევა, საქართველოში არსებულ თითქმის ყველა კომპანიას და ღვინის მარანს დავუკავშირდი და აღმოჩნდა, რომ უმეტესობა ევროპულ ტურებზე მუშაობს. ამასთან, დიდი აქტიურობაა პოსტსაბჭოთა ქვეყნებიდანაც. ცხადია, ეს არ არის ის რაოდენობა, როგორიც უნდა იყოს“, - აღნიშნავს ალადაშვილი და დასძენს, რომ პანდემია თუკი გაჩერდა, ტურიზმი აქ და მსოფლიოშიც სწრაფად გამოცოცხლდება.
,,2023 წლისთვის დიდი მზადებაა, მსოფლიო ტურისტულმა ორგანიზაციამ ტურიზმის წლად გამოაცხადა. 1,8 მილიარდ ტურისტს ფიქრობენ მსოფლიოში, საქართველოს შემთხვევაში, ცხადია, მკვეთღი ზრდა იქნება. ჯერ კიდევ 2020 წელს, როცა საქართველოში მსოფლიო ტურისტული ორგანიზაციის კონფერენცია ჩატარდა, ითქვა, რომ 16 მილიონს მიაღწევს ტურისტების რაოდენობა ქვეყანაში. რამდენად შესრულდება ეს პროგნოზი, დიდწილად დამოკიდებული იქნება პანდემიის საბოლოო დასრულებაზე. ყოველ შემთხვევაში, მოლოდინი ნამდვილად პოზიტიურია. როგორც წესი, პროგნოზი ბრონების მიხედვით, მარკეტინგული გათვლებით და სხვა კრიტერიუმით დგინდება. ამ ეტაპზე ჩვენ რაიმე ხელისშემშლელი მიზეზი არ გვაქვს, საქართველოში ზაფხულის ტურიზმი ნამდვილად შედგება“, - აცხადებს მანანა ალადაშვილი ,,კომერსანტთან“.
ცნობისთვის, მსოფლიო ეკონომიკურმა ფორუმმა (WEF) ანგარიში სახელწოდებით „მოგზაურობისა და ტურიზმის განვითარების ინდექსი 2021“ (Travel & Tourism Development Index 2021 ) გამოაქვეყნა. რეიტინგში სხვადასხვა ქვეყანაში ტურიზმის განვითარების ტემპებია შეფასებული. საქართველო რეიტინგში მსოფლიო საუკეთესო 50-ეულში პირველად მოხვდა. ანგარიშში წარმოდგენილია 117 ქვეყნის რეიტინგი, სადაც საქართველო 44-ე ადგილს იკავებს. 2019 წლის რეიტინგში Travel & Tourism Competitiveness index საქართველოს 68-ე ადგილი ეკავა.
მოგზაურობისა და ტურიზმის განვითარების ინდექსს 2 წელიწადში ერთხელ მსოფლიო ეკონომიკური ფორუმი ადგენს.
მარი ჩიტაია