მართალია ომის გამო საქართველოში მოხმარება გაიზარდა, ბევრი ხალხი ჩამოვიდა, ტურიზმი აღდგა, ფულის ნაკადები გაჩნდა ქვეყანაში და ინვესტიციებიც გაიზარდა, მაგრამ ამან ილუზიაში არ უნდა ჩაგვაგდოს, რომ ჩვენი მიღწევაა, ეს არის ქარის მოტანილი და მას სწორი გამოყენება უნდა. იმის შესანარჩუნებლად გრძელვადიან პერიოდში რომ ეს მოხმარება დარჩეს, უნდა დავახვედროთ საკუთარი პროდუქცია, რომ სხვაზე არ ვიყოთ დამოკიდებული, — ამის შესახებ „ისთ გეით ჯგუფის“ დამფუძნებელმა, ბიზნესმენმა ირაკლი იაშვილმა „კომერსანტთან“ გაზრდილი ინვესტიციების შეფასებისას განაცხადა.

მისი თქმით, ინვეტორებისთვის ძალიან დიდი მნიშვნელობა აქვს პროგნოზირებად გარემოს, რაც საქართველოში დამოუკიდებლობის აღდგენის შემდეგ არ ყოფილა. იაშვილის შეფასებით, რაც ახლა ხდება ქვეყანაში რეგიონში მიმდინარე მოვლენების „დამსახურებაა“ და მის შესანარჩუნებლად მნიშვნელოვანი ნაბიჯების გადადგმაა საჭირო.

„ნებისმიერი დიდი პროექტი რომ განახორციელო ინფრასტრუქტურული, ენერგეტიკული ან ნებისმიერი, რომელიც ქვეყნისთვის მნიშვნელოვანია, ყველა ინვესტიცია არანაკლებ 15 წლიან პერიოდს მოიცავს, მოდი, გადავხედოთ საქართველოს დამოუკიდებლობიდან დღემდე ნებისმიერ 10-15 წლიან პერიოდს და თუ იყო რომელიმე ბიზნესისთვის ხელსაყრელი? - საქართველომ რაც დამოუკიდებლობა აღადგინა ბიზნესში ვარ და მე ასეთი პერიოდი არ მახსენდება. რა თქმა უნდა, უკვე იმუნიტეტი გამოგვიმუშავდა ყველაფერზე, მაგრამ ჩვენ უცხოელ პარტნიორებს, რომლებსაც ვუმტკიცებთ, რომ აქ არის არაჩვეულებრივი გარემო, რეალურად რას ვთავაზობთ? მართალია ფორმალურად, მაგალითად, საგადასახადო რეგისტრაცია და ა.შ ეს ყველაფერი მარტივია, მაგრამ პოლიტიკური პროცესები, რაც ქვეყანაში მიმდინარეობს, არ ვგულისხმობ მხოლოდ ბოლო პერიოდის, არამედ წლების განმავლობაში, არის ბიზნესისთვის არახელსაყრელი.

ამ მთავრობის მოსვლის შემდეგ, ერთადერთი ის მოხდა, რომ საბრძოლო მოქმედებები არ ყოფილა, მაგრამ ეს მუდმივი რყევები, ძალიან რთულია ბიზნესისთვის, მას სჭირდება მინიმუმ 5 წლიანი პროგნოზირებადი გარემო, რომ ახალი პროექტი განახორციელოს. გეოპოლიტიკური სიტუაცია ისედაც მუდმივად ცვალებადია, რაც ჩვენს ეკონომიკაზე გავლენას ახდენს, მათ შორის ადრე იყო ემბარგო, შემდეგ რუსეთ-უკრაინის ომი, სატრანზიტო დერეფანში ტვირთნაკადების ზრდა და ა.შ. ამას შიდა არასტაბილურობა ემატება და ბიზნესი კი ვცდილობთ, რომ დავგეგმოთ ამ არაპროგნოზირებად სიტუაციაში, რაც წინსვლის საშუალებას ძალიან აფერხებს. მართალია ომის გამო საქართველოში მოხმარება გაიზარდა, ბევრი ხალხი ჩამოვიდა, ტურიზმი აღდგა და ფულის ნაკადები გაჩნდა ქვეყანაში, მაგრამ ამან ილუზიაში არ უნდა ჩაგვაგდოს, რომ ჩვენი მიღწევაა, ეს არის ქარის მოტანილი და მას სწორი გამოყენება უნდა, შენარჩუნება გრძელვადიან პერიოდში, რომ ეს მოხმარება დარჩეს, მას კი უნდა დაახვედრო საკუთარი პროდუქცია, რომ სხვაზე არ იყო დამოკიდებული, ჩვენ ახლა მოვიხმართ სხვა ქვეყნის პროდუქციას და იმ ქვეყნების ეკონომიკას ვზრდით, რადგან ეს თანხები აქ კი არ რჩება, გაედინება“, -ამბობს ირაკლი იაშვილი.

2022 წელს საქართველომ რეკორდული 2 მლრდ უცხოური ინვესტიცია მიიღო, რაც 2021 წლის მონაცემებს 61.1%-ით აღემატება. საქსტატის ინფორმაციით, ყველაზე დიდი მოცულობის პირდაპირი უცხოური ინვესტიცია საფინანსო და სადაზღვევო საქმიანობების სექტორში განხორციელდა და 526.4 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 26.3 პროცენტია. მეორე ადგილზე იმყოფება უძრავი ქონების სექტორი 406.9 მლნ. აშშ დოლარით (20.3 პროცენტი), ხოლო მესამეზე - წყალმომარაგების და ნარჩენების მართვის სექტორი 197.0 მლნ. აშშ დოლარით (9.9 პროცენტი).