2021 წლის იანვარ-სექტემბერში საქართველოს 1 188 234 ვიზიტორი ეწვია, რაც 2019 წლის იმავე პერიოდში ჩამოსული ვიზიტორების, მხოლოდ 20%-ია. როგორც „თიბისი კაპიტალის“ კვლევაშია აღნიშნული, 2021 წლის სექტემბერში, 2019 წლის იმავე პერიოდში ჩამოსული ვიზიტორების რაოდენობის 28.9% აღდგა.
სექტემბერში ყველაზე მეტი ვიზიტორი რუსეთიდან ჩამოვიდა (ჯამური რაოდენობის 15%). აღსანიშნავია ისიც, რომ სექტემბერში თურქეთის წილი 2 პროცენტული პუნქტით გაიზარდა 2019 წლის იმავე პერიოდთან შედარებით და 14%-ს გაუტოლდა.
ისრაელიდან ჩამოსული ვიზიტორების წილმა 3% შეადგინა. 2019 წლის სექტემბერთან შედარებით მნიშვნელოვნად გაიზარდა ახლო აღმოსავლეთის ქვეყნებისა (8%) და უკრაინის (10%) წილი. 11%-მდე გაიზარდა ევროკავშირის ქვეყნების წილიც.
საერთო ჯამში, საერთაშორისო ვიზიტორებში მეზობელი ქვეყნების წილი 41%-ს გაუტოლდა. აღსანიშნავია ასევე, რომ იანვარ-სექტემბeრში, 2019 წლის შესაბამისი პერიოდის ტურისტული შემოსავლების 34% უკვე აღდგენილია. ეროვნული ბანკის ანგარიშის მიხედვით, 2021 წლის 9 თვეში საქართველომ ტურიზმიდან $865.8 მლნ. მიიღო, რაც 2019 წლის სამი კვარტლის ტურისტული შემოსავლის 34%-ია.
2021 წლის სექტემბრში 62% შეადგინა და 2019 წლის იმავე პერიოდის მაჩვენებელს გადააჭარბა სასტუმროების დატვირთულობამ კახეთში. აღსანიშნავია ის გარემოებაც, რომ სასტუმროებში საშუალო დღიური ფასი 23%-ით ჩამორჩება 2019 წლის მაჩვენებელს.
დაცული ტერიტორიების სააგენტოს ინფორმაციით, მიმდინარე წლის 30 სექტემბრის ჩათვლით, საქართველოს დაცულ ტერიტორიებზე ვიზიტორთა რაოდენობა, წინა წლის ანალოგიურ პერიოდთან შედარებით, 2.4-ჯერ გაიზარდა. 2021 წლის 9 თვეში საქართველოს დაცულ ტერიტორიებს 500 853 ვიზიტორი ეწვია.
მათივე ინფორმაციით, 2019 წლის 9 თვის მონაცემთან (1 032 293) მიმართებით, 2021 წელს, საქართველოს დაცულ ტერიტორიებზე ვიზიტორთა რაოდენობა 52%-ით არის შემცირებული. მიმდინარე წელს უცხოელი ვიზიტორების რაოდენობა 10.4-ჯერ გაიზარდა. ვიზიტორთა შორის 48% საქართველოს (242 601), ხოლო 52% (258 252) სხვა ქვეყნის მოქალაქეა.
დაცული ტერიტორიებიდან ყველაზე მეტი ვიზიტორი მარტვილის კანიონს სტუმრობდა. ვიზიტორთა ნაკადი ლოკაციებზე ასე გადანაწილდა:
1. მარტვილის კანიონი
2. პრომეთეს მღვიმე
3. ყაზბეგის ეროვნული პარკი
4. ოკაცეს კანიონი
5. მტირალას ეროვნული პარკი
6. თბილისის ეროვნული პარკი
7. სათაფლია
8. ალგეთის ეროვნული პარკი
9. ბორჯომ-ხარაგაულის ეროვნული პარკი
10. ოკაცეს (კინჩხას) ჩანჩქერი
მომდევნო 10 წლის პერსპექტივაში, დაცული ტერიტორიების სააგენტოში ვიზიტორთა 8 მილიონამდე ზრდას ელიან.
ცნობისთვის, რამდენიმე თვის წინ ეკონომიკის მინისტრი, ნათია თურნავა ვარაუდობდა, რომ შესაძლოა, წელს 2019 წელთან შედარებით ტურიზმის შემოსავლები 50%-ით აღდგენილიყო. 2019 წელს კი საქართველომ ტურიზმიდან ჯამში 3.2 მილიარდზე მეტი შემოსავალი მიიღო.
ავტორი: ბელა გელაშვილი
წყარო: ბიზნეს ფორმულა, ბიზნესრევიუ
ტურიზმი
