ივლისში საქართველოში 718,401 საერთაშორისო მოგზაურის ვიზიტი განხორციელდა, რაც გასული წლის მაჩვენებელს 177%-ით აღემატება. 2019 წლის მონაცემებთან შედარებით აღდგენა 65.3%-ია. ივლისში საერთაშორისო ტურისტული ვიზიტების რაოდენობამ 459,711 შეადგინა, რაც 115%-ით მეტია გასული წლის ანალოგიურ პერიოდთან შედარებით, ხოლო 2019 წლის ივლისის თვის მონაცემებთან შედარებით ტურისტული ვიზიტები 80.6%-ით არის აღდგენილი.

თბილისში მდებარე სასტუმრო „ადამოს“ მმართველმა მაია მახათაძემ „კომერსანტთან“ ტურიზმის სექტორში არსებულ აღდგენის დინამიკაზე და პრობლემებზე ისაუბრა. მისი განაცხადებით, ზაფხულის სეზონზე ტურიზმის დინამიური აღდგენა შეინიშნებოდა.

„ზაფხულის სეზონზე ტურიზმის აღდგენის პროცესმა ვერ ვიტყვი, რომ 2019 წლის მაჩვენებელს გადააჭარბა, თუმცა აღდგენა დინამიურად მიმდინარეობდა და პანდემიამდელ პერიოდს დაუახლოვდა. ჩვენი მომდევნო ჯავშნების დინამიკა გვიჩვენებს, რომ სექტემბერშიც გაგრძელდება და შენარჩუნდება დინამიური აღდგენა. ზოგადად სექტემბერიც დატვირთული სეზონის ნაწილად ითვლება და არ ვაანონსებთ რომ აგვისტოში ვასრულებთ მაღალ სეზონს. გვაქვს მოთხოვნა საქმიანი ტურიზმის კუთხითაც, რომელიც უკვე სექტემბრის ჯავშნებზეც აისახა, სიტუაცია აქაც იდენტურია და აღდგენა დინამიური.

რაც შეეხება ტურისტების მრავალფეროვნებას, ძირითადად არაბული ქვეყნებიდან სჭარბობენ. ევროპული მიმართულება, ან თუნდაც ის ქვეყნები, რომელიც საქართველოში არაა ფართოდ წარმოდგენილი, აუცილებლად საჭიროებს ყურადღებას, ამიტომ მარკეტინგული კამპანიები უნდა გაძლიერდეს,” - განაცხადა მაია მახათაძემ.

მაია მახათაძე „კომერსანტთან“ აღნიშნავს, რომ მაღალი ინფლაციური ტემპიდან გამომდინარე, გარკვეულ მომსახურებაზე იგივე ფასის დაფიქსირება შეუძლებელი აღმოჩნდა, შესაბამისად ფასები მცირედით მაგრამ გაიზარდა, თუმცა უმეტესობა მომსახურებაზე ფასები შენარჩუნდა, რადგან დღევანდელი მოგზაური მაინც ბიუჯეტურია და მათზე მცირედი ცვლილებაც დიდ გავლენას ახდენს.

ტურიზმის სექტორში კადრების დეფიციტზე საუბრისას მახათაძე ამბობს, რომ აუცილებელია, ქვეყანაში ყველამ კარგად იცოდეს, თუ რას გულისხმობს შრომითი უფლებები.

„დაქირავებულ თანამშრომელსა და დამქირავებელს შორის შეიძლება ურთიერთობა არასწორად დარეგულირდეს თუ არ იქნება სწორად აღქმული შრომითი უფლებები. კვალიფიციური კადრების დეფიციტის პრობლემა როგორც ყველა სექტორში ჩვენთანაც არის და ვცდილობთ ორმხრივი შეთანხმებით ეს პრობლემა ისე გადავჭრათ, რომ შრომითი უფლებები და მოვალეობები არ დაირღვეს“, — აღნიშნავს სასტუმრო „ადამოს“ მმართველი.