„ტურიზმის სექტორს საშემოსავლო გადასახადის კუთხით შეღავათები 4 თვით გვაქვს. მაგრამ, ივნისსა და ივლისში,  როცა ჩვენ მუშაობას დავიწყებთ და ოფისებს გავხსნით, ტურისტებს მაშინვე  ხომ ვერ მოვიზიდავთ. სავარაუდოდ, ეს მოხდება ოქტომბრის ან ნოემბრის თვეში, შესაბამისად, ეს საშემოსავლო შეღავათები მინიმუმ  წლის ბოლომდე უნდა იყოს  დაწესებული.“  - ამის შესახებ „კომერსანტთან“ისრაელისა და ევროპის ბაზარზე მომუშავე ტურისტული კომპანიის დამფუძნებელმა მაია მურაჩაშვილმა განუცხადა.

ეკონომიკის სამინისტრომ უახლოეს მომავალში ტურიზმის დახმარების პაკეტი ცალკე უნდა წარადგინოს. პაკეტის შემუშავების პროცესში ჩართულები არიან ტურიზმის სექტორის წარმომადგენლები. რა უნდა იყოს გათვალისწინებული დახმარების პროგრამაში და როგორ უნდა შეძლოს კერძო სექტორმა ფეხზე დადგომა, ამ კითხვებზე ტურისტულ კომპანიებს კონკრეტული რეკომენდაციები აქვთ. როგორც მურაჩაშვილი განმარტავს, შემომყვანი ტურიზმზე მიყენებულ დარტყმას სჭირდება შეღავათები და სუბსიდირება როგორც საშემოსავლო გადასახადის კუთხით, ასევე სამომავლოდ უცხოელების ჯგუფების მოსაზიდად და საერთაშორისო გამოფენებზე ქვეყნის პოზიციონირებისთვის.

„როგორც იცით,  ყველაზე მეტად პანდემიის გამო ტურიზმი  დაზარალდა.  სხვა სექტორები მეტნაკლებად შეიძლება აღდგეს , როგორიცაა რესტორნის ბიზნესი, მაგრამ ტურიზმს, განსაკუთრებით შემომყვანს,  ძალიან შეეშალა ხელი. იმ ნიშნულის მიღწევას, რის დადებასაც ამ სეზონზე ვაპირებდით, არ ვიცი როდის მივუაღლოვდებით. გარდა იმისა, რომ ქვეყნის შიგნით სწორი მენეჯმენტი უნდა იყოს და  სუბსიდირება გვჭირდება, ასევე დამოკიდებულები ვართ მსოფლიოში მიმდინარე პროცესებზე და ზოგადად, ამ ვირუსის ჩაცხრობის ტემპზე.

პოზიციონირება იმისა, რომ ჩვენ უსაფრთხო ქვეყანა ვართ ვირუსის თვალსაზრისით, ეს ძირითადი პლატფორმა იქნება, რაზეც ტურიზმის სექტორის მომავალი უნდა დაშენდეს. აქ დგება ერთი საკითხი, ტურისტული კომპანიები მთელი სეზონის მანძილზე მოვიზიდავდით ტურისტებს, ფინანსებს ვდებთ იმაში, რომ საერთაშორისო ტურიზმის გამოფენებში მივიღოთ მონაწილეობა, ვიმოგზაუროთ შეხვედრებზე ჩვენს პარტნიორებთან. ამას გარკვეული რესურსები სჭირდება, რომელსაც  ვაგროვებთ სეზონზე. წელს ეს ვერ მოხდება, ამიტომ ამ კუთხით რაიმე სუბსიდირება იქნება ძალიან კარგი, იმიტომ რომ შემომყვან ტურიზმს დიდი წვლილი მიუძღვის ტურიზმის შენებაში.

მსოფლიოში ფინანსების ნაკლებობაა, შესაბამისად, ტურები, რომელიც იყიდებოდა 1000 დოლარად, ამ თანხებში ვეღარ გაიყიდება, ტურისტი, რომელიც ხარჯავდა 10 000 დოლარს, მისი მხარჯველობითი დონე 40 პროცენტით დაეცემა. ტურისტული კომპანიების განსავითარებლად უნდა მივმართოთ თანხები, რადგან ჩვენ მოგვიწევს ფასების დაწევა და ტურისტების მოთხოვნებზე მორგება.“ - განმარტავს მურაჩაშვილი.  

მარიამ მორგოშია