ყოფილი მიქაელის საავადმყოფოს აუქციონი 3 წელში 4-ჯერ ჩაიშალა. კულტურული მემკვიდრეობის ძეგლს მყიდველი ამ დრომდე არ გამოუჩნდა. მიუხედავად იმისა, რომ საქართველოს მთავრობა ობიექტის გასხვისებას „100 საინვესტიციო შეთავაზება ბიზნესს“ ფარგლებშიც შეეცადა, პროექტმა განსაკუთრებული ინტერესი ჯერჯერობით ვერც ქართველ და ვერც უცხოელ ინვესტორებში ვერ გამოიწვია.  XIX საუკუნეში აშენებული ერთ-ერთი გამორჩეული საავადმყოფო კომპლექსი წლებია მიტოვებული და ამორტიზებულია.

წმ. მიქაელის სახელობის ყოფილი საავადმყოფოს ტერიტორია 2015 წლის დასაწყისში 4 მლნ აშშ დოლარად გაიყიდა. მაშინ ინვესტორი ვალდებული იყო ტერიტორიაზე არანაკლებ 200-ოთახიანი, 5-ვარსკვლავიანი სასტუმრო და სამორინე განეთავსებინა. საინვესტიციო ვალდებულება არანაკლებ 100 მლნ ლარს შეადგენდა, ხოლო კომპანიას სამშენებლო სამუშაოები 2016 წლის დასაწყისისთვის უნდა დაეწყო. კომპანიამ ხელშეკრულებით ნაკისრი ვალდებულებები არ შეასრულა და იმავე წლის ბოლოს „აღმას“ ქონება ჩამოერთვა.

ქონების ეროვნულმა სააგენტომ ობიექტი საპრივატიზაციოდ 2018 წელს გამოიტანა. საავადმყოფო კომპლექსი საწყისი ფასი 35 მილიონი ლარი, ხოლო საინვესტიციო ვალდებულება კი 100 მილიონი ლარი იყო, თუმცა აუქციონი ვერ შედგა.

წარუმატებელი აღმოჩნდა 2019 წელის იანვარში იდენტური ღირებულებით და საინვესტიციო ვალდებულებებით გამოცხადებული აუქციონიც.

შედეგი საინვესტიციო ვალდებულებების 40 მილიონამდე შემცირებამ გამოიღო. ობიექტი ვერც 2019 წლის ნოემბერში გასხვისდა.

ბოლოს, აუქციონი 2021 წლის 30 მარტს გამოცხადდა, რა დროსაც ობიექტის საწყისი ფასი 39,800,000 ლარამდე გაიზარდა. ამ შემთხვევაშიც საინვესტიციო ვალდებულება ისევ 40,000,000 ლარი იყო. თუმცა, აუქციონი ჩაიშალა.

როდის გამოიტანს აუქციონზე ობიექტს სახელმწიფო ქონების ეროვნული სააგენტო, ჯერჯერობით უცნობია. უწყებაში ამ ეტაპზე არც ის იციან, კიდევ შეიცვლება თუ საინვესტიციო ვალდებულებები.

მიუხედავად იმისა, რომ ეკონომიკისა და მდგრადი განვითარების მინისტრი 2019 წელს პრივატიზაციის პროცესს აჩქარებდა, ნათია თურნავას მოუგვიანდა და მიხაილოვის საავადმყოფო კომპლექსი ისევ სახელმწიფო ბალანსზეა.

 ბაჩო ადამია