თურქეთის, ფინეთისა და შვედეთის საგარეო საქმეთა მინისტრებმა სამმხრივ მემორანდუმს მოაწერეს ხელი, რომელიც ადასტურებს, რომ მადრიდის NATO-ს სამიტზე თურქეთი მხარს დაუჭერს ალიანსში ფინეთისა და შვედეთის გაწევრიანებას. „NATO-ში ჩვენს გაწევრინებასთან დაკავშირებით კონკრეტული ნაბიჯები ნატო-ს მოკავშირეებთან უახლოესი ორი დღის განმავლობაში შეთანხმდება, მაგრამ ეს გადაწყვეტილება ახლა გარდაუვალია“, – ნათქვამია ფინეთის პრეზიდენტის ვებგვერდზე გამოქვეყნებულ განცხადებაში.

განცხადებაში აღნიშნულია, რომ ფინეთი გულდასმით ეკიდება თურქეთის წუხილს ტერორიზმის რისკებთან დაკავშირებით და გმობს ტერორიზმის ყველა ფორმას. ფინეთმა და შვედეთმა ალიანსში გაწევრიანების სურვილი ერთი თვის წინ გამოთქვეს და NATO-ში განაცხადი შეიტანეს. ორი ქვეყნის ამ გადაწყვეტილებას თურქეთი ეწინააღმდეგობდა.

NATO— ს გენერალური მდივნის იენს სტოლტენბერგის განცხადებით, ის დარწმუნებულია, რომ ფინეთი და შვედეთი შეძლებენ წარმატებით შეუერთდნენ ალიანსს მას შემდეგ, რაც თურქეთმა ხელი მოაწერა აღნიშნულ სკანდინავიურ ქვეყნებთან ურთიერთგაგების სამმხრივ მემორანდუმს. „მოხარული ვარ განვაცხადო, რომ ჩვენ ახლა გვაქვს შეთანხმება, რომელიც გზას უხსნის ფინეთისა და შვედეთის ნატოში გაწევრიანებას. თურქეთმა, ფინეთმა და შვედეთმა ხელი მოაწერეს მემორანდუმს, რომელიც მიემართება თურქეთის შეშფოთებას, მათ შორის იარაღის ექსპორტსა და ტერორიზმთან ბრძოლასთან დაკავშირებით“, - განაცხადა სტოლტენბერგმა მემორანდუმის ხელმოწერის შემდეგ ჟურნალისტებთან საუბრისას.

დიდი ბრიტანეთის პრემიერ-მინისტრი ბორის ჯონსონი თურქეთის გადაწყვეტილებას მიესალმა და მას „ფანტასტიკური სიახლე უწოდა. „შვედეთისა და ფინეთის გაწევრიანება ჩვენს ბრწყინვალე ალიანსს უფრო ძლიერს და უსაფრთხოს გახდის, - დაწერა ჯონსონმა „ტვიტერის“ საკუთარ გვერდზე.