„სუეცის არხის ინციდენტის შემდეგ წინა პლანზე ჩვენს ტერიტორიაზე არსებული დერეფნები გამოვიდა. ჩვენ განვახორციელეთ უამრავი ინფრასტრუქტურული პროექტი და ძალიან მალე ამის შედეგებსაც ვნახავთ. სტამბოლის არხი, ნაოსნობის და ნავიგაციის ავტონომიური სისტემით, მსოფლიოში ყველაზე უსაფრთხო ლოგისტიკური მარშრუტი გახდება“, - განაცხადა თურქეთის ტრანსპორტის და ინფრასტრუქტურის მინისტრმა ადილკარაისმა ილოგლუმ.
მისი თქმით, აზიას და ევროპას შორის სატვირთო გადაზიდვებისთვის, სუეცის არხის ერთ-ერთი საუკეთესო ალტერნატივაა დერეფანი, რომელის თურქეთიდან კავკასიაში მიდის, შემდეგ კასპიის ზღვის გავლით თურქმენეთში და ყაზახეთში, საბოლოოდ კი ჩინეთში ჩადის.
„სუეცის კრიზისმა ცხადყო, რომ ისტორიული „აბრეშუმის გზა“, კერძოდ კი პროექტი „ერთისარტყელი, ერთი გზა“ დროის და ხარჯების დაზოგვის კუთხით, ყველაზე ოპტიმალური და უსაფრთხო მარშრუტია“, - განაცხადა მინისტრმა.
ამ დერეფნის განვითარების პერსპექტივა ჯერ კიდევ 2020 წელს გამოჩნდა, როდესაც პირველი საექსპორტო სატვირთო მატარებელი თურქეთიდან ჩინეთში, 2 კონტინენტის, 2 ზღვის და 5 ქვეყნის გავლით, 10 დღეში ჩავიდა.
„კიდევ ერთ, რუსულ მარშრუტთან შედარებით, ჩვენი დერეფანი უფრო სწრაფი და ეკონომიური და 2000 კილომეტრით მოკლეა. ის ასევე უკეთესია კლიმატური პირობების თვალსაზრისით. საზღვაო მარშრუტებთან შედარებითაც, ჩვენი დერეფანი 15 დღით ნაკლებ დროს მოითხოვს“, - ამბობს კარაის მაილოგლუ.
გარდა ამისა, თურქეთის საპორტო ინფრასტრუქტურა აზიიდან ახლო აღმოსავლეთში, ჩრდილოეთ აფრიკაში და ხმელთაშუა ზღვის რეგიონში ტვირთების მინიმალურ დროში ტრანსპორტირების საშუალებას იძლევა. სწორედ ამიტომ, თურქეთი ლოგისტიკური ინფრასტრუქტურის განვითარებას განაგრძობს.
„ჩინეთს და ევროპას შორის სავაჭრო ბრუნვა დღეს წელიწადში 600 მლრდ. დოლარს შეადგენს და დერეფნის ეფექტური გამოყენება რეგიონის ყველა ქვეყანას დიდ სარგებელს მოუტანს. ჩვენი რეგიონის ქვეყნებმა კრიზისი შესაძლებლობად უნდა აქციონ და დერეფნის განვითარებაზე ერთიანად უნდა ვიზრუნოთ“, - თვლის თურქეთის ტრანსპორტის და ინფრასტრუქტურის მინისტრი.
მისი თქმით, სუეცის კრიზისმა დაადასტურა, რომ ალტერნატიულ მარშრუტების დამუშავების დრო უკვე მოვიდა.
„ამ მხრივ, თურქეთის ტერიტორიაზე გამავალი დერეფანი, ბოლო წლებში განვითარებული სარკინიგზო პროექტების გათვალისწინებით, გახდება მარშრუტი, რომლითაც ქვეყნები ერთმანეთს სწრაფად და უსაფრთხოდ დაუკავშირდებიან. ჩვენ პორტებს, რკინიგზებს და ლოგისტიკურ ობიექტებს ვაშენებთ და ის ჩვენ დასავლეთს და აღმოსავლეთს შორის დამაკავშირებელი რგოლის როლის შესრულების საშუალებას მოგვცემს“, - განაცხადა კარაისმაილ ოგლუმ.
მისი თქმით, მოთხოვნა ახალ გზებზე ამ პროცესს დააჩქარებს.
„სტამბოლის არხის სახით მსოფლიო ყველაზე უსაფრთხო ლოგისტიკურ მარშრუტს მიიღებს. არც ჩვენ და არც მსოფლიო ეკონომიკას არავითარი შეფერხებები არ შეექმნება“, - მიჩნევს მინისტრი.
turkiyegazetesi.com
მოამზადა თენგიზ აბლოთიამ