თურქეთი, 2023 წელს მსოფლიოში პირველი ეროვნული „მწვანე“ ან ეკოტურიზმის პროგრამის დაწყებას გეგმავს, რომელიც რამდენიმე ეტაპისგან შედგება და 2030 წლამდე გაგრძელდება. აღნიშნუის შესახებ ინფორმაციას გაზეთი Milliyet-ი ავრცელებს.
პროგრამა გლობალური მდგრადი ტურიზმის საბჭოსთან (GSTC) თანამშრომლობის შეთანხმების ფარგლებში განხორციელდება და ითვალისწინებს გლობალური მდგრადი განვითარების პრაქტიკის განხორციელებას ადგილობრივ ტურისტულ ინდუსტრიაში და პარიზის კლიმატის შეთანხმების საფუძველზე, გარემოს დაბინძურების შემცირებას.
პანდემიის დროს თურქულ სასტუმროებში „უსაფრთხო ტურიზმის“ სერტიფიკატების შემოღების შემდეგ, რითაც დაადასტურა, რომ ისინი აკმაყოფილებენ აუცილებელ ზომებს ტურისტებისთვის უსაფრთხო და ჯანსაღი დასვენების უზრუნველსაყოფად, ქვეყნის ტურიზმის სამინისტრომ დაიწყო მზადება „მწვანე ტურიზმის“ პროგრამის დასაწყებად. იგი ასევე ითვალისწინებს სასტუმროების მიერ შესაბამისი სერთიფიკატების მიღებას, წერს Milliyet.
გამოცემის ცნობით, პროგრამის განხორციელების დაწყება 2023 წლის იანვრიდან იგეგმება. პირველ ეტაპზე შემუშავდება ეროვნული პროგრამის კრიტერიუმები და კომპანიებს ჩაუტარდებათ ტრენინგი. თებერვალში, სავარაუდოდ, პროექტში ჩაერთვებიან ტურისტული ინდუსტრიის მონაწილეები, რომლებიც მზად არიან მიიღონ მონაწილეობა აღნიშნული პროექტის განხორციელებაში.
მეორე ეტაპზე, ანუ 2025 წლისთვის იგეგმება სერტიფიცირების სისტემის ეტაპობრივი დანერგვა, 2030 წლისთვის კი მდგრადი ტურიზმის ყველა საერთაშორისო სტანდარტის და პარიზის კლიმატის შეთანხმების დანერგვა, რომელსაც თურქეთმა გასულ წელს მოაწერა ხელი.
თურქეთის ტუროპერატორთა კავშირის ხელმძღვანელმა ფირუზ ბაღლიკაიამ Milliyet-თან ინტერვიუში ყურადღება გაამახვილა პროგრამის ფარგლებში ატმოსფეროში ემისიების შემცირების მნიშვნელობაზე. ამას, მისივე თქმით, ხელს შეუწყობს ავიაკომპანიების მიერ მრავალი საათის ნაცვლად საშუალო და მოკლე ფრენების პრაქტიკის გავრცელება.
„მსოფლიო ტურიზმის ორგანიზაციის მონაცემებით, ხანგრძლივ ფრენებზე ნახშირორჟანგის ემისია ერთ მგზავრზე ექვსჯერ მეტია მოკლე რეისებთან შედარებით. თურქეთი იმ ქვეყნების სიაშია, სადაც 3-4 საათიანი ფრენით მოხვედრა შესაძლებელია და ეს არის მისი უპირატესობა“, - განაცხადა პროფკავშირის ხელმძღვანელმა.
მისივე თქმით, საერთაშორისო მოგზაურობაში ჩართული ტურისტული სააგენტოების 87%-ს სურს განახორციელოს თავისი პროგრამები მდგრადი ტურიზმის ფარგლებში.
„ტურისტების ორი მესამედი ურჩევნია დარჩეს ისეთ ადგილებში, სადაც ყურადღება ექცევა გარემოს დაცვას“, - თქვა ბაღლიკაიამ.