იანვარ-ნოემბერში თურქეთიდან ზღვის ლოკოკინების ექსპორტის ღირებულებამ 15 მლნ 478 ათას 635 დოლარი შეადგინა. ამის შესახებ სააგენტო Anadolu-ს თურქეთის აღმოსავლეთ შავი ზღვის რეგიონის ექსპორტიორთა ასოციაციის (DKİB) გამგეობის თავმჯდომარის მოადგილემ, აჰმედ ჰამდი გურდოგანმა განუცხადა.
მისი თქმით, მიმდინარე წლის 11 თვეში ექსპორტზე 8 ქვეყანაში 1836 ტონა ზღვის ლოკოკინა გავიდა.
„საანგარიშო პერიოდში სამხრეთ კორეა გახდა ამ პროდუქციის წამყვანი იმპორტიორი. ამ ქვეყანაში ზღვის ლოკოკინების ექსპორტის მოცულობამ 8 მლნ 316 ათას 546 დოლარი შეადგინა. მას მოსდევს იაპონია - 2 მლნ 459 ათას 112 დოლარი და ესპანეთი - 2 მლნ 30 ათას 814 დოლარი. განსახილველ პერიოდში ამ პროდუქციის ექსპორტი განხორციელდა აშშ-სა და საქართველოშიც“, - განაცხადა გურდოგანმა.
DKİB-ის გამგეობის თავმჯდომარის მოადგილემ აღნიშნა, რომ თურქეთის შავი ზღვის რეგიონიდან ზღვის ლოკოკინების ექსპორტმა 9 მლნ 168 ათას 115 დოლარი შეადგინა. გაყიდვები განხორციელდა 5 ქვეყანაში, ძირითადად სამხრეთ კორეაში. პროდუქციის იმპორტიორთა სიაში ასევე შედიოდა ჩინეთის სახალხო რესპუბლიკა, იაპონია, ტაივანი და შეერთებული შტატები.