თურქეთის აზერბაიჯანული გაზის შესყიდვების გაზრდას გეგმას - ამის შესახებ ანკარაში თურქეთის საგარეო საქმეთა მინისტრმა მევლუთ ჩავუშოგლუმ თავის აზერბაიჯანელ კოლეგასთან ჯეიხუნ ბაირამოვთან ერთად ჩატარებულ ერთობლივ პრეს-კონფერენციაზე განაცხადა. მისი თქმით, აზერბაიჯანი თურქეთში გაზის მიწოდების მხრივ პირველ ადგილზე გავიდა. ანკარა შესყიდვების შემდგომაც გეგმავს ზრდას.
„ერთ-ერთი ჩვენი პრიორიტეტია - გაზსადენი ნახჩევანიდან, რომელიც ჩვენი ქვეყნისთვის სტრატეგიულად მნიშვნელოვანია“ - განაცხადა თურქეთის საგარეო უწყების ხელმძღვანელმა.
მაისში თურქეთის მიერ მოხმარებული გაზის 33% სწორედ აზერბაიჯანზე მოდის, მეორე ადგილზეა ყატარი (19,5%). პარალელურად რუსეთის წილი განუხრელად მცირდება - ის დღეს მესამე ადგილზეა. შემცირება ჯერ კიდევ აპრილში დაიწყო, მაშინ რუსეთის წილი 17,8%-ს შეადგენდა, მაისში კი - 12,7% იყო.
ამ ეტაპზე სწორედ აზერბაიჯანია რეგიონში რუსეთის კონკურენტი. მოსკოვი ნელა-ნელა თურქულ ბაზარს ბაქოს უთმობს - 2020 წლის 5 თვის მანძილზე აზერბაიჯანული გაზის ექსპორტი თურქეთში 8%-ით გაიზარდა 2019 წლის ანალოგიურ პერიოდთან შედარებით და 5,6 მლრდ. კუბური მეტრი შეადგინა.
ამ დღეებში აზერბაიჯანის როლზე გაზის საერთაშორისო ბაზარზე ქვეყნის პრეზიდენტმა ილჰამ ალიევმა ისაუბრა.
„საბადო „შახ-დენიზი“ როგორც მინიმუმ კიდევ 100 წელი აზერბაიჯანს და მოკავშირე ქვეყნებს გაზით მოამარაგებს. ჩვენ ასევე მიწოდების გეოგრაფიის გაფართოებას ვგეგმავთ. ამ საბადოდან გაზი საქართველოში, თურქეთში, ბულგარეთში, საბერძნეთში და იტალიაში წავა. აზერბაიჯანული გაზის ექსპორტი სხვა ქვეყნებშიც შეიძლება, მაგალითად, ბალკანეთის რეგიონში“, - განაცხადა პრეზიდენტმა.
მისი თქმით, რამდენიმე თვეში სამხრეთ საგაზო დერეფანი მწყობრში მთლიანად შევა.
„ამ საქმის შესრულებით ჩვენ ევრაზიის ახალ რუკას ვქმნით, აზერბაიჯანი დიდი ხნის მანძილზე ევროპის სტრატეგიული პარტნიორი დარჩება“, - განაცხადა ილჰამ ალიევმა.
2019 წელს გაზმა „შახ-დენიზ-2“-დან პირველად ევროკავშირში ჩააღწია, კერძოდ საბერძნეთში საქართველოზე და თურქეთზე გამავალი მილსადენით.
აზერბაიჯანული გაზის ევროპაში მიწოდების მთავარი მარშრუტი სამხრეთ საგაზო დერეფანი იქნება. მასში სამხრეთ კავკასიური გაზსადენი, რომელიც საქართველოს გავლით გაზით თურქეთს ამარაგებს, ტრანსანატოლიური გაზსადენი თურქეთში და მშენებარე ტრანსადრიატიკული გაზსადენი შედის, რომელიც საბერძნეთის, ალბანეთის, და იტალიის ტერიტორიებზე გაივლის.
წყარო ekhokavkaza.ru
მომზადა თენგიზ აბლოთიამ