თურქეთმა რუსეთში სანქცირებული საქონლის ტრანზიტი შეაჩერა. ლოგისტიკური კომპანიები აცხადებენ, რომ თურქეთის საბაჟო სისტემა საქონლის ტრანზიტულ განბაჟებას ბლოკავს. ჯერ-ჯერობით, ბაზრის მოთამაშეთა უმეტესობა, ამას აშშ-სა და ევროკავშირის მხრიდან თურქეთზე გაზრდილ ზეწოლას უკავშირებს. ამის შესახებ ბელარუსული მედია წერს.

რუსული კომპანიების წარმომადგენლები აცხადებენ, რომ ისინი თურქი პარტნიორებისგან ინფორმაციას იღებენ რუსეთის ფედერაციის მიმართულებით გადაზიდვების შეწყვეტის შესახებ. პირველ რიგში, საუბარი სანქცირებულ ტვირთზეა.

„გუშინ დავიწყეთ აგენტებისგან შეტყობინებების მიღება, რომ ადრე შეთანხმებული ფრენების ჯავშნები გაუქმდა. მათ თქვეს, რომ მიზეზი თურქეთისთვის სატრანზიტო ტვირთი რუსეთში შეჩერებაა“, - განაცხადა კომპანია „ოპტიმალოგის“ აღმასრულებელმა დირექტორმა გეორგი ვლასტოპულომ.

თურქეთის ხელისუფლებას და საბაჟო სამსახურებს ამის შესახებ ოფიციალური განცხადებები არ გაუვრცელებიათ. არაფორმალურ კომუნიკაციაში ლოჯისტიკოსები მხოლოდ ვარაუდებს გამოთქვამენ, რაც ჯერ დადასტურებული არ არის.

„ოფიციალურ ბრძანებებს და დადგენილებებს არ ველოდებით, ვინაიდან ასეთ შემთხვევაში თურქეთმა უნდა აღიაროს, რომ ბოლო წლის განმავლობაში რუსეთის მიმართულებით სანქცირებულ ტვირთებს ატარებდა. ამიტომ, ინფორმაცია არაოფიციალური არხებით მოვა და პრაქტიკაშიც ვნახავთ“, – აცხადებს კომპანიის Transasia Logistics-ის კომერციული დირექტორი ვალერია სავენკოვა.

თუ თურქეთის გავლით პარალელური იმპორტის ტრანზიტის სრული დაბლოკვის შესახებ ინფორმაცია დადასტურდება, ეს პრობლემა იქნება ბელარუსისთვისაც, რადგან საკმაოდ დიდი რაოდენობით ტვირთი შედის თურქეთიდან ბელარუსიაშიც.

ბელარუსული მედია წერს, რომ გადამზიდავების პრობლემების სავარაუდო მიზეზი შესაძლოა იყოს აშშ-სა და ევროკავშირის მხრიდან თურქეთზე გაზრდილი ზეწოლა. ისინი დიდი ხანია უკმაყოფილოები არიან რუსეთისთვის თურქეთის საჰაერო და საზღვაო ნავსადგურების გავლით „სანქცირებული ტვირთების“ მიწოდებით. რუსეთსა და თურქეთს შორის სავაჭრო ბრუნვა 2022 წლის იანვრიდან სექტემბრამდე გაორმაგდა და 45 მილიარდ დოლარს მიაღწია.