26 ტანკერმა, რომელზეც 23 მილიონ ბარელზე მეტი ყაზახური ნავთობია, ბოსფორისა და დარდანელის გავლა ვერ შეძლო, ამის შესახებ, გადაზიდვების მონაცემებზე დაყრდნობით, Bloomberg-ი იტყობინება.

თურქეთის სანაპიროებთან მდგარ გემებზე ნავთობის უმეტესი ნაწილი ყაზახური წარმოშობისაა. მხოლოდ ერთ გემს გადააქვს დაახლოებით 1 მილიონი ბარელის ოდენობის „ურალის“ მარკის რუსული ნავთობი, რომელიც ინდოეთისთვისაა განკუთვნილი.

დანარჩენ ტანკერებზე ყაზახური ნავთობია, რომელზეც არ ვრცელდება ნავთობზე დაწესებული ფასის ზედა ზღვარი. მიუხედავად ამისა თურქეთი  სრუტეში გამავალი ყველა ტანკერიდან ითხოვს დაღვრისა და შეჯახებისგან  დაზღვევის დამატებით დადასტურებას.

ოფიციალური ანკარის განმარტებით ნავთობის ფასის ზედა ზღვრის დაწესებამ გაზარდა მის წყლებში დაუზღვეველი ტანკერების ყოფნის რისკი.

მიუხედავად იმისა, რომ ყაზახური ნავთობი სანქციებს არ ექვემდებარება, თურქეთის შეშფოთების მიზეზი შესაძლოა იყოს ის, რომ ტანკერები რუსული პორტიდან გამოვიდნენ - წერს Bloomberg-ი.

ამერიკელი და ბრიტანელი ჩინოვნიკები ანკარასგან დაჟინებით ითხოვენ, რომ გადახედოს დაზღვევის დადასტურების მოთხოვნებს, რადგან ყაზახური ტვირთები სანქციებს არ ექვემდებარება.

ამასთან, თურქეთი დაყოვნებული ტანკერების მცირე რაოდენობას ასახელებს.  მათი მონაცემებით საცობში ახლა მხოლოდ 15 გემია. მათგან 11 ევროკავშირის ქვეყნებისკენ მიემართებოდა.

Bloomberg-ი ასევე წერს, რომ თურქეთის სრუტეებში გაჭედილი ტანკერების მფლობელებს ფრახტისთვის (გემით ტვირთის გადაზიდვის ქირა) დამატებით 13 მილიონი დოლარის გადახდა მოუწევთ. ჯერჯერობით გაურკვეველია, აუნაზღაურებენ თუ არა დამქირავებლები ტანკერების მფლობელებს დაყოვნების ღირებულებას. ერთ-ერთი ტანკერის მფლობელმა უკვე მიიღო შეტყობინება დამქირავებლისგან, რომ ანაზღაურებას არ აპირებს.

ტანკერების საცობის შესახებ პირველად Financial Times-მა დაწერა 5 დეკემბერს. საცობი ბოსფორისა და დარდანელის სრუტეების მახლობლადაა წარმოქმნილი. სწორედ ამ სრუტეების გავლით უკავშირდებიან რუსეთის შავის ზღვის პორტები საერთაშორისო ბაზრებს.

ტანკერების საცობის წარმოქმნა მოხდა იმ დღეს, როდესაც ძალაში შევიდა რუსული ნავთობის ფასზე ზედა ზღვრის დაწესების გადაწყვეტილება, რომელიც ევროკავშირმა და დიდი შვიდეულის წევრმა ქვეყნებმა მიიღეს. მოკავშირეებმა აკრძალეს იმ ტანკერების დაზღვევა, რომლებსაც ისეთი რუსული ნავთობი გადააქვთ, რომლის ფასიც ბარელზე 60 დოლარს აჭარბებს.