თურქეთმა გასულ წელს მოცვის ფართობი 200-250 ჰა-მდე გაზარდა. ქვეყანა 5 000 ჰექტარზე მეტი საწარმოო ფართობით, ასევე, 100 000 ტონა მოცვის წარმოებით, მომდევნო 5-10 წლის განმავლობაში კენკრის ბაზარზე შესაძლოა, ერთ-ერთი მთავარი მიმწოდებელი გახდეს. ამის შესახებ თურქული კენკრის მწარმოებელი კომპანია Safir Berry-ის გამგეობის თავმჯდომარემ, თურგუთ აისანმა FreshPlaza-ს განუცხადა.
Safir Berry-მ 2020 წელს პროექტი, Turkish Blueberry წამოიწყო და 2021 წელს ანტალიასა და მანისაში მოცვის პლანტაციები გააშენა, რითიც მისი ფართობი გაორმაგდა. მიწის ფართობისა და წარმოების მოცულობის გაზრდის გამო, კომპანია მოელის, რომ 2023 წელი თურქეთისთვის კარგი საექსპორტო წელი იქნება.
მთავარი საექსპორტო მიმართულება მზარდი ევროპული ბაზარი იქნება, როგორიც არის დიდი ბრიტანეთი, გერმანია, ავსტრია, ბენილუქსის ქვეყნები, საფრანგეთი, სკანდინავია და ა.შ. თუმცა თურქეთს, ასევე, აქვს ლოგისტიკური უპირატესობა, რაც საშუალებას აძლევს, სპარსეთის ყურის ქვეყნების, რუსეთისა და შორეული აღმოსავლეთის ბაზრებზე ერთი საჰაერო რეისით ჰქონდეს წვდომა.
Safir Berry წელს 60-70 ტონა მოცვის მოსავალს მოელის, რაც მხოლოდ ადგილობრივი ბაზრისთვის იქნება საკმარისი. თუმცა კომპანიაში იმედოვნებენ, რომ 2023 წელს, დაახლოებით, 1000 ტონა მოცვის ექსპორტს შეძლებენ.
წლევანდელი ზამთარი ანტალიაში მეტად ცივი იყო და 25 წლის განმავლობაში, ქვეყნის სამხრეთით მდებარე ამ პროვინციაში პირველად მოთოვა. მოსავლის აღება მარტის ბოლომდე გადაიდო. თუმცა Safir Berry-მ ანტალიაში აგებულ გამძლე პლასტმასის გვირაბებში დაპატენტებული საცდელი ჯიშების მოსავლის აღება თებერვალში დაიწყო. კლიმატური ცვლილებების გამო, თურქული მოცვის წარმოების დიდი ნაწილი ასეთ გვირაბებსა და თანამედროვე სათბურებში მოხდება.
თურგუთ აისანის თქმით, ტრადიციულ კულტურებთან შედარებით, მოცვზე ადგილობრივი მოთხოვნა მაღალი ფასების გამო დაბალია. თუმცა კენკრის მოხმარება, განსაკუთრებით, დიდ ქალაქებში იზრდება. ამჟამად მოცვის ადგილობრივი ფასები ისეთივე მაღალია, როგორც საერთაშორისო, რის შედეგადაც თურქეთში წარმოებული კენკრის უმეტესობა ადგილობრივ ბაზარზე იყიდება.
პროექტ Turkish Blueberry-ის ფარგლებში, Safir Berry აპირებს, მოცვის წარმოებას ჟოლოსა და მაყვლის მოშენება დაამატოს.
ცნობისათვის, მსოფლიოში მოცვის ექსპორტს ყველაზე დიდი რაოდენობით 7 ქვეყანა ახორციელებს - პერუ, ჩილე, მექსიკა, აშშ, სამხრეთ აფრიკა, პოლონეთი და კანადა. სერიოზულად იზრდება ლურჯი მოცვის ბარების რაოდენობა საქართველოშიც.
ამასთან, ამერიკის შეერთებული შტატების სოფლის მეურნეობის დეპარტამენტის (USDA) ანგარიშის თანახმად, 2025 წლისთვის მოცვის გლობალური ექსპორტი, ფულადი გამოსახულებაში, 3 მლრდ დოლარამდე გაიზრდება.
წუარო: "ბიზნესპრესნიუსი"