თურქეთში იმ 250-ბინიანი კომპლექსის მშენებლობის კონტრაქტორი დააკავეს, სადაც მიწისძვრის შედეგად ასობით ადამიანი დაიღუპა. ამის შესახებ თურქული გამოცემა Hurriyet-ი წერს.

თურქეთის პოლიციამ სტამბულის აეროპორტში ჰატაის პროვინციაში პრესტიჟული 12-სართულიანი საცხოვრებელი კომპლექსი „რენესანსის“ მშენებლობის კონტრაქტორი მეჰმედ იასარ ქოსკუნი დააკავა. მამაკაცი საზღვარგარეთ წასვლას ცდილობდა, თან დიდი რაოდენობით ფული ჰქონდა.

კონტრაქტორი გაზიოსმანფაშას პროკურატურის ბრძანებით დააკავეს და პოლიციის განყოფილებაში გადაიყვანეს. 250-ბინიანი რეზიდენცია „რენესანსი“ ინონას ბულვარზე, ჰატაის ანტაკიის რაიონში მდებარეობდა. მისი მშენებლობა 2013 წელს დასრულდა. 2023 წლის 6 თებერვალს შენობა ძლიერი მიწისძვრის შედეგად მთლიანად დაინგრა.

დრონის მიერ გადაღებულ კადრებში ჩანს, რომ შენობა გადაბრუნდა და მეორე სახლი დაანგრია. მედიის ინფორმაციით რენესანსში დაახლოებით 1000 ადამიანი ცხოვრობდა.

მომხდართან დაკავშირებით დედამიწის შემსწავლელი ინსტიტუტის გეოგრაფიის დეპარტამენტის უფროსი ლაშა სუხიშვილი სოციალურ ქსელში წერს, რომ „Rönesans Residence-ი იყო 12-სართულიანი კომპლექსი აუზით, სპორტული მოედნებით, სპორტდარბაზით და საუნით. რეკლამა უკეთდებოდა, როგორც A piece of paradise (სამოთხის მსგავსი ადგილი - რედაქცია). მშენებლები ამბობდნენ, რომ შენობა უმაღლესი სამშენებლო სტანდარტებით ააშენეს. ეს იყო ორშაბათამდე. დღეს 200-მდე ოჯახიდან უმეტესობა ისევ ნანგრევებშია. თერმული კამერებიდან ჩანს რომ ბევრი ცოცხალია“.