„გამყვან ტურიზმზე მოთხოვნა მაღალია, ფასები თურქეთში 20-30%-ით გაზრდილია, ესპანეთში 100%-იანი გაძვირებაა“ - განაცხადა “ტურები.ჯი“-ს დირექტორმა ნიკა გოგოლაძემ „დილის პალიტრაში“.
მისივე ინფორმაციით, გემოვნებისა და სურვილების გათვალისწინებით, ანტალიაში ერთკვირიანი დასვენების მინიმალური პაკეტი, პოსტპანდემიურ პერიოდში, საშუალოდ 1000-1200 ლარი ჯდებოდა, მიმდინარე სეზონზე ფასი 1500 ლარამდეა გაზრდილი.
ქართველი მომხმარებლების დაბალი მსყიდველუნარიანობის გათვალისწინებით ყველაზე მაღალი მოთხოვნა სწორედ თურქეთის კურორტებზეა, შემდეგ მოდის ქალაქები - პრაღა, ვენა, ბუდაპეშტი, საბერძნეთის კურორტები და იტალიის ქალაქები.
რაც შეეხება შიდა ტურიზმს, გოგოლაძის ინფორმაციით, როგორც ქართველი, ასევე უცხოელი ვიზიტორების მხრიდან გაზრდილია მოთხოვნა მცირე, 2-3 დღიან ტურებზე ქვეყნის შიგნით. მსგავსი ტურების ფასი 200-250 ლარის ფარგლებში მერყეობს.
„წელს ძალიან რთული წელი იქნება ტურიზმის სექტორისთვის“ - აღნიშნა ნიკა გოგოლაძემ საქართველოში ტურიზმის აღდგენის შეფასებისას. რეგიონში კონფლიქტის გავლენით, ტურისტულ პაკეტებზე მნიშვნელოვნად შემცირდა მოთხოვნა ევროპული ბაზრებიდან, პერმანენტულად უქმდება ჯავშნები, ბალტიისპირეთის ქვეყნებიდან კი ტურისტული ნაკადები სრულად შეჩერებულია.
მისივე თქმით, ბალანსს არაბული ქვეყნებიდან და მცირე აზიიდან შემოსული ტურისტები ქმნიან. 2019 წლის პანდემიამდელ პერიოდთან შედარებით კი წლევანდელ ზაფხულის სეზონზე, გოგოლაძე აღდგენის 50%-მდე მაჩვენებს პროგნოზირებს.