შუამავალი კომპანიების მეშვეობით რუსეთის ფედერაციას 777 მილიონი დოლარის ღირებულების ჩიპები გადაეცა, ინფორმაციას Reuters-ი ავრცელებს.

რუსეთის ფედერაციის წინააღმდეგ დაწესებული სანქციების მიუხედავად, დასავლური კომპანიების მიერ წარმოებული მიკროჩიპების რუსეთში მიწოდება გრძელდება.

როგორც Reuters-ის გამოძიებაშია ნათქვამი, შუამავალი ფირმები თურქეთსა და ჰონგ კონგში რუსეთისთვის მიკროჩიპების მიყიდვის მიზნით შეიქმნა. 2022 წლის მარტში დარეგისტრირებული კომპანიების მეშვეობით რუსეთის ფედერაციას 777 მილიონი დოლარის ღირებულების ჩიპები გადაეცა. ეს არის Intel-ის, AMD-ის, Texas Instruments-ის, Analog Devices-ის და Infineon-ის მიერ წარმოებული ჩიპები.

გამოცემა წერს, რომ 2022 წლის მარტიდან, შვიდი თვის განმავლობაში, ერთ-ერთმა კომპანიამ რუსეთში მინიმუმ 20 მილიონი დოლარის ღირებულების ჩიპები გაიტანა.

კიდევ ერთი ფირმა Turkish Smart Trading Ltd.-ეა, რომელიც რუსული ლოგისტიკური კომპანია Novelco-ს აღმასრულებელმა დირექტორმა, გრიგორი გრიგორიევმა შექმნა. რუსეთის საბაჟო დეკლარაციების მიხედვით, კომპანიამ რუსეთში სულ მცირე 660 000 აშშ დოლარის ღირებულების ნახევარგამტარები გაგზავნა.

გამოცემა ასევე წერს, რომ აღმოაჩინეს გრიგორიევის LinkedIn-ის ერთ-ერთი პოსტი, სადაც ნათქვამია, რომ Novelco-მ ფილიალი სტამბოლში გახსნა და დაწესებული შეზღუდვების მიუხედავად, საქონელს რუსეთში თურქეთიდან აგზავნის.

გამოცემა წერს, რომ რუსეთს სანქციების გვერდის ავლაში ესტონეთის კომპანიაც ეხმარება. ტალინში დაფუძნებულმა Elmec Trade-მა2022 წლის 1 აპრილიდან 31 ოქტომბრამდე რუსეთში მინიმუმ 17 მილიონი დოლარის საქონელი გაგზავნა.

Elmec Trade-ის გენერალურმა მენეჯერმა ალექსანდრ ფომენკომ Reuters-ს განუცხადა, რომ მისი კომპანია პროდუქტებს ოფიციალური არხებით ყიდულობს და ყველა საკანონმდებლო მოთხოვნას აკმაყოფილებს.